ស្នេហាបែបច្បាស់លាស់! ទាក់ទងគ្នា ២ ឆ្នាំ Kelly កាន់ដៃគូស្នេហ៍ចូលរោងការហើយ

បន្ទាប់ពីចែកផ្លូវគ្នាជាមួយនឹងអតីតភរិយាវ័យក្មេងទៅ តារាប្រុស Kelly ក៏បានផ្តើមស្នេហ៍ជាមួយនឹងនាង Ploy ដែលគេស្គាល់ថាជាអ្នកជំនួញលុយវាល់លាន។ ហើយចាប់តាំងពីទាក់ទងជាមួយនឹងអ្នកជំនួញ Ploy មក គេសង្កេតឃើញជីវិតតារាប្រុសរូបនេះ ហាក់ដូចជារីករាយ និង មានក្ដីសុខខ្លាំង ដោយជារឿយៗគូស្នេហ៍ចាស់ទុំមួយគូនេះតែងបានបង្ហាញពីសកម្មភាពផ្អែមល្ហែមចំពោះគ្នាទៅវិញទៅមកនៅលើបណ្ដាញសង្គមអ៊ីនស្ត្រាក្រាម។

ដ្បិតជាស្នេហាចាស់ទុំមែន សម្រាប់គូស្នេហ៍តារាប្រុស Kelly និង អ្នកជំនួញលុយវាល់លាន Ploy គឺពោរពេញដោយភាពផ្អែមល្ហែមមិនចាញ់គូស្នេហ៍ក្មេងៗឡើយ រហូតធ្វើឱ្យអ្នកអន្ទះសាចង់ឃើញចូលរោងការឆាប់ៗ។ យ៉ាងណាមិញ ការរំពឹងទុករបស់មហាជនពិតជាបានមកដល់មែន ដោយនៅថ្ងៃទី ០២ ខែតុលា ឆ្នាំ ២០២៣ នេះ តារាប្រុស Kelly បានកាន់ដៃគូស្នេហ៍ចូលរោងការទៅតាមប្រពៃណីហើយ។

សម្រាប់កម្មវិធីមង្គលតារាប្រុស Kelly គេឃើញថាមានអ្នកសិល្បៈជាច្រើនចូលរួម រីឯកូនកំលោះក្រមុំការស្រស់ស្អាត និង ពោរពេញដោយសេចក្តីសុខសុភមង្គល។ អាចនិយាយបានថា ជាស្នេហាបែបច្បាស់លាស់ ស្រឡាញ់គ្នាត្រឹម ២ ឆ្នាំប៉ុណ្ណោះ គឺកា្លយជាប្តីប្រពន្ធនឹងគ្នា៕