ចប់កម្មវិធីទទួលពានភ្លាម ស៊ីន យូប៊ីន និង Paing Takhon ដឹកដៃគ្នាថតរូប បង្ហាញមិត្តភាពជិតដិតខ្លាំង

បើកឆាកថ្ងៃទី ១ ខែតុលា ឆ្នាំ ២០២៣ កន្លងទៅ តារាសម្ដែងស្រីដ៏ឆ្នើមរបស់កម្ពុជា គឺកញ្ញា ស៊ីន យូប៊ីន ទទួលបានកិត្តិយសដ៏វិសេសវិសាលចូលរួមទទួលបានពានរង្វាន់ក្នុងកម្មវិធី Hall of fame in Singapore ឬ HOFS 2023 នៅប្រទេសសិង្ហបុរី ដែលកម្មវិធីនេះមានសិល្បករល្បីៗជាច្រើនរូបឡើងទទួលពានរង្វាន់ ក្នុងនោះក៏មានតារាសម្ដែងមីយ៉ាន់ម៉ា លោក Paing Takhon ផងដែរ។

ចប់កម្មវិធីទទួលពានរង្វាន់ ស្រីស្រស់ប្រុសសង្ហា Paing Takhon និង ស៊ីន យូប៊ីន បាននាំគ្នាថតរូបទុកជាអនុស្សាវរីយ៍ ដើម្បីជាការចងចាំនូវសមិទ្ធផលថ្មីរបស់ពួកគេ។ សកម្មភាពថតរូបរបស់ពួកគេទាំងពីរ ហាក់ជិតដិតគ្នាខ្លាំងប្រៀបដូចជាបងប្អូន ហើយលើសពីនេះ ស៊ីន យូប៊ីន ថែមទាំងបានបង្ហោះសាររៀបរាប់ពីការគោរពស្រឡាញ់រាប់អានគ្នារវាងនាង និង ប្រុសស្អាត Paing Takhon ទោះបីកាយនៅឆ្ងាយ តែបេះដូងនៅជិតគ្នា។

ដូចប្រិយមិត្តបានជ្រាបស្រាប់ហើយថា Paing Takhon ធ្លាប់មកសម្ដែងខ្សែភាពយន្តនៅកម្ពុជា ហើយក៏ធ្លាប់សម្ដែងជាដៃគូជាមួយស្រីស្រស់ ស៊ីន យូប៊ីន ដែរ ដែលធ្វើឱ្យអ្នកទាំងពីរមានភាពស្និទ្ធស្នាលជាមួយគ្នាខ្លាំង៕