មកដឹងបច្ចុប្បន្នភាព Top 4 របស់ The Voice Cambodia រដូវកាលទី ៣ ក្រោយកម្មវិធីចប់បានជាង ២ ខែ

បើគិតចាប់តាំងពីវគ្គផ្តាច់ព្រ័ត្រកាលពីថ្ងៃទី ១ ខែកញ្ញា ឆ្នាំ ២០២៣ មកដល់ពេលនេះ កម្មវិធី The Voice Cambodia រដូវកាលទី ៣ បានបញ្ចប់ទៅរយៈពេលប្រមាណជាង ២ ខែមកហើយ ដោយម្ចាស់ពានរង្វាន់បានទៅលើកញ្ញា លឹម សេរីហាន់នីកា ដែលជាកូនក្រុមរបស់គ្រូបង្វឹក ពេជ្រ សោភា។

ក្រៅពីម្ចាស់ជ័យលាភី កញ្ញា លឹម សេរីហាន់នីកា មហាជនអ្នកគាំទ្រក៏បានចាប់អារម្មណ៍ខ្លាំងទៅកាន់ជើងខ្លាំង ៣ រូបផ្សេងទៀតដែរ ដែលបានឈានមកដល់វគ្គផ្តាច់ព្រ័ត្រ។ ថ្ងៃនេះ «ប្រជាប្រិយ» នឹងលើកយកពីបច្ចុប្បន្នភាពរបស់ Top 4 The Voice Cambodia រដូវកាលទី ៣ មកជម្រាបជូន។

១. កញ្ញា លឹម សេរីហាន់នីកា

ម្ចាស់ពានរង្វាន់ លឹម សេរីហាន់នីកា ក្រោយពីក្លាយជាតារាចម្រៀងជំនាន់ថ្មីប្រចាំផលិតកម្មរស្មីហង្សមាសហើយនោះ តារាស្រីវ័យក្មេងរូបនេះបានបង្ហាញវត្តមានលើឆាកតន្ត្រីជាច្រើន។ លើសពីនោះ លឹម សេរីហាន់នីកា ក៏ត្រៀមចេញបទចម្រៀងថ្មីរបស់ខ្លួនថែមទៀតផង។

២. កញ្ញា គឹម សុវណ្ណ

កញ្ញា គឹម សុវណ្ណ កូនក្រុមរបស់ Coach ឱក សុគន្ធកញ្ញា បើទោះជាមិនបានក្លាយជាម្ចាស់ពានក៏ពិតមែន តែបេក្ខនារីរូបនេះបានក្លាយទៅជា Idol ដក់ជាប់ក្នុងចិត្តរបស់អ្នកគាំទ្រជាច្រើន។ បច្ចុប្បន្ន កញ្ញា គឹម សុវណ្ណ ក៏បានបង្ហាញវត្តមានលើឆាកតន្ត្រី ព្រមទាំងមមាញឹកក្នុងការងាររាជការរបស់នាងផងដែរ។

៣. លោក សាល បាទី

មិនខុសពីបេក្ខនារីខាងលើនោះទេ លោក សាល បាទី កូនក្រុម ឆន សុវណ្ណារាជ ក៏បន្តអាជីពលើវិថីសិល្បៈចម្រៀងដូចដើម។ ក្នុងនោះ លោក សាល បាទី ក៏កាន់តែផ្ទុះប្រជាប្រិយភាពខ្លាំងឡើងៗទៀតផង។

៤. លោក សួន សុវណ្ណចន្នី

ជើងខ្លាំងកូនក្រុម Coach ណុប បាយ៉ារិទ្ធ លោក សួន សុវណ្ណចន្នី ក៏ដូចគ្នាដែរ បច្ចុប្បន្នក៏កំពុងមមាញឹកខ្លាំងក្នុងការចូលរួមកម្មវិធីតន្ត្រីនានា។ ក្នុងនោះ លោក សួន សុវណ្ណចន្នី ក៏កាន់តែក្តោបបានការគាំទ្រខ្លាំងពីសំណាក់មហាជនដូចគ្នា៕