Pat បង្ហាញសកម្មភាពមួយ ក្រោយទទួលបានដំណឹងថាអតីតស្វាមីត្រូវដោះលែងឱ្យមានសេរីភាព

នៅថ្ងៃទី ២៤ ខែតុលា ឆ្នាំ ២០២៣ នេះសារព័ត៌មានកម្សាន្តថៃជាច្រើនបានចេញផ្សាយពីរឿងក្តីអតីតស្វាមីតារាសម្ដែងស្រី Pat Napapa ជុំវិញរឿងក្តីជួយដូរគ្រឿងញៀន និង លាងលុយកង្វក់ ដោយពេលនេះតុលាការបានសម្រេចក្តីដោះលែងលោក Benz Racing ឱ្យចេញពីគុកហើយក្រោយពីឃុំខ្លួនក្នុងពន្ធនាគារគ្រប់ចំនួន ៣ ឆ្នាំ និង ៤ ខែ។

នេះបើតាមការឱ្យដឹងបន្ថែមពីសារព័ត៌មានក្នុងស្រុក លោក Benz Racing ដែលជាអតីតស្វាមីតារាសម្ដែងស្រី Pat Napapa ត្រូវបានតុលាការនៃសាលាឧទ្ធរណ៍រកឃើញថាពុំមានភស្តុតាងគ្រប់គ្រាន់ ហើយក៏ឱ្យឃុំឃាំងរយៈពេល ៣ ឆ្នាំ និង ៤ ខែ រហូតពេលនេះ លោក Benz ក៏បានឃុំខ្លួនគ្រប់ចំនួន ដូចនេះនៅវេលាម៉ោង ៦ ថ្ងៃទី ២៤ ខែតុលា ឆ្នាំ ២០២៣ នេះនឹងមានការដោះលែងហើយ។

យ៉ាងណាមិញ បន្ទាប់ពីទទួលបានដំណឹងថា Benz Racing ត្រូវដោះលែងពីពន្ធនាគារនៅល្ងាចនេះ ឃើញថា មានសាច់ញាតិ និង មិត្តៗក្នុងសិល្បៈជាច្រើនអបអរជំនួស។ ជាក់ស្តែង ក្នុងនោះ គេសង្កេតឃើញថា សូម្បីតែប្អូនស្រីរបស់ Pat ក៏បានបង្ហោះរូបភាពរៀបការរបស់ Pat ជាមួយនឹងអតីតស្វាមីដែរ ព្រមជាមួយខេបសិនថា ៖ «ក្រោយភ្លៀងមេឃគង់ស្រឡះ»។ បន្ទាប់ពីប្អូនស្រីបង្ហោះបែបនេះភ្លាម បើងាកទៅមើល Pat វិញ បានចូលទៅ Like រូបភាពមួយនោះភ្លែត ហើយអ្វីដែលពិសេស ល្ងាចនេះមហាជនក៏ចាំមើលដែរថា តើ Pat បង្ហាញវត្តមានទៅទទួលអតីតស្វាមីដែរ ឬទេ៕