កំលោះសង្ហាសាច់ដុំមាំ Step ធ្វើខួបអាយុ ២៩ ឆ្នាំ មិនមែនធ្វើម្នាក់ឯងឡើយ ឆ្នាំនេះពោរពេញដោយក្តីស្រឡាញ់

ប្រិយមិត្តច្បាស់ជាស្គាល់រួចមកហើយនូវតារាចម្រៀងរូបសង្ហាមានឈ្មោះពិតថា សុខ វិបុល ហៅ Step ដែលជាសិល្បករមួយរូបពោរពេញទៅដោយសម្ថតភាពខាងតែងនិពន្ធបទចម្រៀង ហើយទទួលបានជោគជ័យខាងវិស័យចម្រៀងមិនតិចឡើយ ហើយថ្មីៗនេះទៀតសោតតារាចម្រៀងរូបនេះ ក៏ទើបតែប្ដូរមកនៅ GenMusic ដែលជាផលិតកម្មថ្មីផងដែរ។

យ៉ាងណាមិញ កាលពីថ្ងៃទី ២៩ ខែតុលា ឆ្នាំ ២០២៣ កន្លងទៅនេះ Step និង តារាចម្រៀងស្រីម្នាក់ទៀត ដែលស្ថិតនៅក្នុងផលិតកម្មតែមួយ គឺកញ្ញា SK បានទៅមណ្ឌលកុមារកំព្រាព្រៃជុំ ក្នុងថ្ងៃខួបកំណើតរបស់លោក ដើម្បីចែករំលែកក្តីស្រឡាញ់ជាមួយក្មេងៗ ហើយជាមួយគ្នានោះដែរ Step ក៏បានបង្ហោះសារជាមួយនឹងរូបថតជាច្រើនសន្លឹក នៅក្នុងគណនីផេកផ្លូវការរបស់ខ្លួនថា ៖ «Happy 29th Birthday ឆ្នាំនេះអត់ម្នាក់ឯងទេ មានប្អូនៗអ្នកផ្លុំ និង កាត់នំខេកជាមួយច្រើន នៅមណ្ឌលកុមារកំព្រាព្រៃជុំ A wonderful experience»។

ក្រោយតារាចម្រៀងរូបនេះបង្ហោះសារបែបនេះ គេឃើញមានអ្នកគាំទ្រជាច្រើនបានចូលមកសរសើរនូវទឹកចិត្តរបស់ Step ដែលមានចំពោះក្មេងៗនៅទីនោះ និង មានពាក្យពេចន៍ជូនពរជាច្រើនដល់តារាច្រៀងរូបសង្ហានេះផងដែរ៕