Bright ទម្លាយច្បាស់ៗទាន់ខ្លួននៅក្មេងខំធ្វើការឱ្យហើយ តែដល់អាយុ ៣៥ ឆ្នាំ គឺចង់មានពេលវេលាទាំងនេះសម្រាប់ខ្លួនម្តង

សម្រាប់តារាសម្ដែងរូបសង្ហា Bright Vachirawit ជាតារាមួយរូបដែលកំពុងតែទទួលបានភាពជោគជ័យពីសំណាក់អ្នកគាំទ្រទាំងក្នុងប្រទេស និង ក្រៅប្រទេសផងដែរ។ បើនិយាយពីតារាងការងាររបស់តារាសម្ដែងប្រុសរូបនេះវិញ គឺមិនសូវមានពេលទំនេរប៉ុន្មាននោះទេ ព្រោះមានជាប់រហូត ដូចជា ការងារសម្ដែង ច្រៀង ការថតពាណិជ្ជកម្ម និង ហាត់សមសម្រាប់កម្មវិធីជួបជុំជាមួយអ្នកគាំទ្រនៅចុងឆ្នាំ ២០២៣ នេះ។

យ៉ាងណាមិញ កាលពីពេលថ្មីនេះអ្នកកាសែតបានជួប Bright ក៏បានសួរពីការងារ ដោយតារាសម្ដែងប្រុសរូបនេះបានប្រាប់ពីគម្រោងការងារសម្រាប់ឆ្នាំ ២០២៤ ថា ៖ «សម្រាប់ឆ្នាំក្រោយមានការងារ ២ ទៅ ៣ ផងដែរ ដែលកំពុងតែនិយាយគ្នា ដូចនេះច្បាស់ណាស់ថាកាន់តែមិនបានបាត់មុខបាត់មាត់ទៅណានោះទេ ជាពិសេសនោះនឹងមានខ្សែភាពយន្តថែមទៀតផង»។

តារាសម្ដែង Bright Vachirawit ក៏បាននិយាយបន្ថែមពីមូលហេតុដែលខ្លួនខិតខំប្រឹងប្រែងធ្វើការ ដោយមិនសូវមានពេលសម្រាក ដោយសារតែរូបលោកមានគោលបំណងមួយថា នៅពេលដែលខ្លួនមានអាយុ ៣៥ ឆ្នាំ នឹងកាត់បន្ថយការខ្លះៗហើយ ព្រោះតែចង់មានពេលជាមួយគ្រួសារ និង មានពេលធ្វើរឿងដែលខ្លួនចង់ធ្វើ ហើយនៅពេលខ្លួនដល់អាយុ ៣៥ ឆ្នាំ ពេលនោះបើមានរឿងណាដែលខ្លួនមិនចង់ធ្វើក៏នឹងមិនធ្វើនោះទេ៕