មិនទាន់ក្លាយជាសង្សារពេញលេញមែន តែ Mik មានទំនាក់ទំនងលើសពីមិត្តនឹងស្រីស្រស់ Preaw
កាលពីពេលថ្មីៗកន្លងទៅនេះ មហាជនហាក់មានការចាប់អារម្មណ៍ខ្លាំង អំពីទំនាក់ទំនងរវាងតារាប្រុសរូបសង្ហា Mik Thongraya និង តារាសម្ដែងស្រីប្រចាំប៉ុស្តិ៍ទូរទស្សន៍លេខ ៧ នាង Preaw Tussaneeya ។
កន្លងមក គេតែងឃើញថា អ្នកទាំងពីរឧស្សាហ៍ឃើញបង្ហាញសកម្មភាពផ្អែមល្ហែមជាមួយគ្នាពុំសូវដាច់លើបណ្ដាញសង្គមអ៊ីនស្តាក្រាម។ ជាពិសេស មហាជនធ្លាប់បានឃើញរូបភាពបែកធ្លាយ តារាស្រី Preaw បានងើយថើបថ្ពាល់តារាប្រុស Mik ទៀតផង។ លើសពីនោះទៀត Mik ក៏ធ្លាប់បានទិញកាដូតម្លៃថ្លៃ ជូនឱ្យតារាស្រី Preaw ទៀតផង ដែលនេះធ្វើឱ្យមហាជនផ្ទុះការសង្ស័យចំពោះពួកគេទាំងពីរថា មានទំនាក់ទំនងអាចលើសពីមិត្ត។
ដោយឡែក ជារឿយៗគេសង្កេតឃើញទំនាក់ទំនងតារាស្រីប្រុសទាំងពីរកាន់តែជិតស្និទ្ធទៅៗ ព្រោះថាអ្នកកំលោះ Mik តែងចូលទៅបញ្ចេញមតិលែបខាយចំពោះតារាស្រី Preaw រហូតនៅពេលដែលស្រីស្រស់ Preaw បង្ហោះរូបភាព ឬ សកម្មភាពផ្សេងៗលើបណ្ដាញសង្គមអ៊ីនស្តាក្រាម។
ជាក់ស្តែង អ្វីដែលអ្នកគាំទ្រញញឹមបិទមាត់មិនជិតនោះ គ្រាន់តែឆ្នាំថ្មីចូលមកដល់ភ្លាម អ្នកកំលោះ Mik Thongraya ព្រមបង្ហើបទំនាក់ទំនងរវាងលោក និង កញ្ញា Preaw ហើយថា អ្នកទាំងពីរពេលនេះកំពុងតែមើលចិត្តថ្លើមគ្នា ចំណែកឯទំនាក់ទំនងខាងមុខយ៉ាងណានោះមានតែបន្តចាំមើលតែប៉ុណ្ណោះ៕
