មុនបានតំណែងជាតួឯកប្រុស Alek Teeradetch ធ្លាប់ដើរតួអង្គធម្មតាៗអមសាច់រឿង សឹងតែគ្មានអ្នកស្គាល់

ប្រិយមិត្តច្បាស់ជាស្គាល់រួចមកហើយនូវតារាសម្ដែងប្រុស Alek Teeradetch ដែលជាតារាសម្ដែងប្រចាំទូរទស្សន៍ប៉ុស្ដិ៍លេខ ៣ ថៃមួយរូប ដែលមានរូបសង្ហា និង មានសមត្ថភាពសម្ដែងក្នុងរឿងភាគជាច្រើននាពេលកន្លងមក។

ដោយឡែក បើនិយាយពីអាជីពជាតារាសម្ដែងរបស់ Alek ដែលជ្រកក្រោមទូរទស្សន៍ប៉ុស្ដិ៍លេខ ៣ តាំងពីឆ្នាំ ២០១៣ មកទល់បច្ចុប្បន្ន តារាសម្ដែងប្រុសរូបនេះបានបង្ហាញស្នាដៃនៅក្នុងរឿងភាគជាច្រើនឱ្យទូរទស្សន៍ខាងលើប្រហែល ២០ រឿងហើយ ហើយអាជីពលើវីថិសិល្បៈមួយនេះក៏មិនងាយនោះដែរ ទម្រាំរូបលោកមានការគាំទ្រ និង ទទួលបានក្ដីស្រឡាញ់ពីមហាជនដូចសព្វថ្ងៃនេះ។

ជាការពិតណាស់ សម្រាប់តារាប្រុស Alek ចាប់ផ្ដើមដំបូងមិនមែនទទួលតំណែងជាតួឯកប្រុសដូចសព្វថ្ងៃនេះទេ ដោយរូបលោកគ្រាន់ជាតួសម្ដែងធម្មតានៅក្នុងរឿងតែប៉ុណ្ណោះ ហើយក៏មិនសូវមានអ្នកស្គាល់ ឬ ចាប់អារម្មណ៍លើរូបលោកប៉ុន្មានទេ រហូតដល់ឆ្នាំ ២០១៥ រឿងដំបូងដែល Alek មានឱកាសចាប់បានតំណែងជាតួឯកប្រុសគឺរឿង «Wai Saeb saraek Kard» ក្រោយសម្ដែងរឿងនេះ Alek ក៏ទទួលបានតំណែងជាតួឯករហូតមកដល់ពេលនេះ ព្រមទាំងមានអ្នកគាំទ្រជាច្រើនបានស្រឡាញ់ និង តែងតែគាំទ្ររាល់រឿងភាគរបស់តារាប្រុសរូបនេះ ព្រមទាំងការងារជាច្រើនទៀតផង៕