អាយុត្រឹម ១២ ឆ្នាំ អូនឈើ រកលុយពីសិល្បៈបានពេញៗដៃ ចំណែកឯរឿងរៀនសូត្រ ក៏មិនឱ្យប៉ាម៉ាក់បារម្ភ

ជឿជាក់ថាប្រិយមិត្តយើងច្បាស់ជាស្គាល់ជាក់ជាពុំខានតារាសម្ដែងពេញដោយទេពកោសល្យ អូន Inter Rungrada ឬ ប្រិយមិត្តមួយចំនួនហៅថា អូនឈើ ដែលតារាសម្ដែងស្រីវ័យក្មេងមានសមត្ថភាពខ្ពស់រូបនេះ អាចសម្ដែងបានគ្រប់ទម្រង់ មិនថាកម្សត់ កាច ឬ កំប្លែងនោះទេ។

តារាសម្ដែងស្រីវ័យក្មេង អូនឈើ បានប្រឡូកចូលលើវិស័យសិល្បៈតាំងពីអាយុ ៥ ឆ្នាំមកម៉្លេះ ឥលូវធ្មេចបើកៗ កុមារីរូបនេះមានអាយុ ១២ ឆ្នាំបាត់ទៅហើយ ហើយបើនិយាយពីសម្រស់វិញមហាជនសរសើរមិនដាច់ពីមាត់ឡើយ។ ជាការពិត ទោះបីមានអាយុតិចមែនតែសមត្ថភាពសិល្បៈវិញ អាចក្តាប់បានឱកាសការងារច្រើនសន្ធឹកសន្ធាប់ក្នុងវិស័យភាពយន្ត និង រឿងភាគទូរទស្សន៍របស់ថៃ។

ក្រៅពីការងារសម្ដែងនាងតូច Inter Rungrada ក៏ក្តាប់បានឱកាសជាតារាបង្ហាញម៉ូដ និង ជាអ្នករាំផងដែរ។ អាយុតិចមែន តែសមត្ថភាពពេញខ្លួន ហើយការសិក្សាក៏ល្អអាចរកប្រាក់ចំណូលជូនគ្រួសារតាំងពីតូចក្រូចឆ្មារ ធ្វើឱ្យមហាជនតែងលាន់មាត់សរសើរជានិច្ច៕