គូព្រេងពីអតីត! តារាប្រុស ៣ រូប ជំពប់ស្នេហ៍អ្នកជំនួញអនឡាញ ចាប់ដៃគ្នាសាងជីវិតគូយ៉ាងផ្អែមល្ហែម

មហាជនអ្នកលេងបណ្ដាញសង្គមច្បាស់ជាបានចាប់អារម្មណ៍តាមដានហើយពីរឿងរ៉ាវស្នេហារបស់អ្នកជំនួញអនឡាញល្បីៗឈ្មោះប៉ុន្មានរូប ដែលបន្ទាប់ពីជួបនឹងជីវិតគូមិនសមបំណងម្ដង ក៏បានរកឃើញម្ចាស់ស្អំបេះដូងថ្មី ជាកំលោះរូបសង្ហាៗអ្នកក្នុងសិល្បៈ ដែលបានស្រឡាញ់យល់ចិត្តគ្នា និង ចាប់ដៃគ្នាសាងជីវិតគូជាថ្មីផងដែរ។

១. លោក រស់ រជ្ជសាល និង ថៅកែពេជ្រលោកស្រី ទ្រី ដាណា

គិតមកដល់ពេលនេះ រយៈពេលជិត ៨ ខែមកហើយ ដែលថៅកែពេជ្រ ទ្រី ដាណា បានបញ្ចប់ឈ្មោះជាមេម៉ាយរៀបការនឹងកំលោះរូបសង្ហាជាសិល្បករមួយរូប គឺលោក រស់ រាជ្ជសាល កាលពីថ្ងៃទី ៣ ខែធ្នូ ឆ្នាំ ២០២៣ កន្លងទៅ។ ក្រោយពីរៀបការមង្គលការយ៉ាងអធិកអធម និង ប្តូរងារពីគូដណ្តឹងទៅជាស្វាមីភរិយាពេញច្បាប់ហើយ ថៅកែពេជ្រ ទ្រី ដាណា និង ស្វាមី ក៏តែងបង្ហាញការរស់នៅយ៉ាងមានសុភមង្គលជាប្រចាំ ដោយមានស្វាមីយកចិត្តទុកដាក់មើលថែជានិច្ច។

២. លោក ថុល សុភិទិ និង អ្នកនាង ឡុង ម៉ានីន

មហាជនអ្នកតាមដានបានជ្រាបហើយពីចំណងស្នេហ៍រវាងតារាប្រុសសង្ហា ថុល សុភិទិ និង ស្រីស្អាតជាលក់អនឡាញល្បីឈ្មោះ ឡុង ម៉ានីន ដ្បិតតែកន្លងមកធ្លាប់មានរឿងរកាំរកូសគ្នាខ្លះៗ ប៉ុន្តែចាប់តាំងពីត្រូវរូវគ្នាឡើងវិញ កាន់តែស្រឡាញ់ផ្អែមល្ហែមនឹងគ្នាលើសដើម ដោយពួកគេទាំងពីរតែងថតរូបបញ្ជាក់ពីក្ដីស្នេហ៍ដ៏សែនល្អូកល្អិនបង្ហោះនៅលើបណ្ដាញសង្គមជារឿយៗ ព្រមទាំងប្រើភាសាស្នេហាដ៏ផ្អែមមុតធ្វើឱ្យអ្នកគាំទ្រឃើញហើយរំភើបចិត្តជំនួសទៀតផង។

៣. លោក ប៊ឺរី និង អ្នកនាង Madam Da

ពិតណាស់ ចំពោះរឿងរ៉ាវស្នេហារបស់តារាសម្ដែងប្រុសសង្ហា ប៊ឺរី និង អ្នកជំនួញអនឡាញដ៏ល្បី Madam Da ក្រោយពីផ្ទុះការតាមដានសង្ស័យមួយរយៈ ថ្មីៗនេះ បានធ្វើឱ្យមហាជនអ្នកគាំទ្រចាប់អារម្មណ៍ និង អបអរខ្លាំង ខណៈបានឃើញសាមីខ្លួនខាងប្រុស គឺលោក ប៊ឺរី បានចេញមុខឡាយវីដេអូនិយាយប្រកាសបើកចំហចំណងស្នេហ៍របស់អ្នកទាំងពីរជាសាធារណៈហើយ ព្រមទាំងបញ្ជាក់ថាអ្នកទាំងពីរច្បាស់លាស់ជាមួយគ្នា ត្រៀមរៀបការសាងអនាគតជាមួយគ្នាទៀតផង៕