ថ្ងៃល្អ ខែល្អ! ឈិន ម៉ានិច្ច បើកសម្ពោធហាងរកស៊ីក្លាយជាថៅកែស្រីទាំងវ័យក្មេង

បើនិយាយដល់កញ្ញា ឈិន ម៉ានិច្ច មហាជនច្បាស់ជាបានជ្រាបច្បាស់មកហើយ ពីពន្លកថ្មី ដែលដុះចេញពីកម្មវិធី Cambodia Idol រដូវកាលទី ២។ ក្នុងនោះ ក្រោយពីក្លាយជាម្ចាស់ពានកម្មវិធីខាងលើ និង បានបោះជំហានឈានចូលវិថីសិល្បៈអស់រយៈពេលជាច្រើនឆ្នាំ កញ្ញា ឈិន ម៉ានិច្ច បានសាងកេរ្ដិ៍ឈ្មោះ ភាពល្បីល្បាញ និង ប្រជាប្រិយភាពពីមហាជនមិនធម្មតានោះដែរ។

ពីមួយឆ្នាំទៅមួយឆ្នាំ ឈិន ម៉ានិច្ច កាន់តែបោះជំហានយ៉ាងជោគជ័យលើវិថីសិល្បៈចម្រៀង ដោយនាងមិនត្រឹមតែទទួលបានឱកាសច្រៀងលើឆាកតន្រ្តីធំៗនៅក្នុងប្រទេសទេ ប៉ុន្ដែតារាចម្រៀងស្រីសំឡេងផ្អែមស្រួយស្រែសរូបនេះ ក៏ក្ដោបបានឱកាសទៅច្រៀងនៅក្រៅប្រទេសផងដែរ។

មិនត្រឹមតែប៉ុណ្ណោះ តារាចម្រៀងស្រីរូបនេះ ក៏បានសាងក្តីស្រមៃរបស់ខ្លួន ឱ្យក្លាយទៅជារឿងពិតបណ្តើរៗហើយ ដោយកន្លងមកនាងបានទិញឡាន ទិញផ្ទះ និង នាំអ្នកម្តាយទៅដើរកម្សាន្តនៅក្រៅប្រទេស កើតចេញពីការប្រឹងប្រែងដោយកម្លាំង​ញើស​ឈាម​របស់នាងផ្ទាល់។

យ៉ាងណាមិញ នៅថ្ងៃទី ០៩ ខែកញ្ញា ឆ្នាំ ២០២៤ នេះ តារាស្រីវ័យ ៣០ ឆ្នាំ រូបនេះ បានបំពេញក្តីស្រមៃមួយទៀត ដោយនាងបានក្លាយទៅជាថៅកែហាងស្ប៉ាមួយកន្លែងមានយីហោ «MANICH BEAUTY SPA»។ ក្នុងថ្ងៃល្អនេះ អ្នកគាំទ្រ និង មិត្តទាំងក្នុង ក្រៅសិល្បៈជាច្រើនបានចូលរួមអបអរ និង ជូនពរដល់កញ្ញា ឈិន ម៉ានិច្ច ឱ្យជោគជ័យលើរបរថ្មីទៀតផង៕