(វីដេអូ) ស្រីភក្រ្ត ដើរចេញពីផ្ទះបាយ MasterChef ទាំងទឹកភ្នែក ខណៈបេក្ខជន Top5 គ្មានអ្នកណាចុះមកជូនដំណើរសូម្បីម្នាក់
មកដល់សប្ដាហ៍ទី ២៣ នេះ កម្មវិធីប្រកួតធ្វើម្ហូប MasterChef Cambodia រដូវកាលទី ៣ កាន់តែក្ដៅគគុកព្រោះកាន់តែកៀកថ្ងៃប្រកាសម្ចាស់ជ័យលាភីឈ្នះពានរង្វាន់លេខ ១ មែនទែនហើយ ដោយពេលនេះបានឈានដល់ការប្រកួតចម្រាញ់យកបេក្ខជនជើងខ្លាំង ៥ នាក់ចុងក្រោយ ឬ Top5 ហើយអ្នកដែលត្រូវជម្រុះចេញពីកម្មវិធីក្នុងសប្ដាហ៍នេះគឺ ស្រីភក្រ្ត។
ដ្បិតថាមិនអាចឈានជើងចូលក្នុងចំណោមបេក្ខជន ៥ នាក់ចុងក្រោយនៃកម្មវិធី ប្រកួតធ្វើម្ហូប MasterChef Cambodia រដូវកាលទី ៣ ដូចក្ដីស្រមៃមែន ប៉ុន្ដែ ស្រីភក្រ្ត ក៏ត្រូវបានចាត់ទុកជាបេក្ខជនជើងខ្លាំងមួយរូប ព្រោះកន្លងមក ស្រីភក្រ្ត តែងទទួលបានការសរសើរពីថ្វីដៃធ្វើម្ហូបពីសំណាក់គណៈកម្មការទាំង ៣ ហើយបេក្ខជន Top6 រូបនេះ ក៏បានតែងបង្ហាញភាពលេចធ្លោ និង យកឈ្នះលើបេក្ខជនផ្សេងទៀតជាច្រើន។
មុនពេលចាកចេញ ស្រីភក្រ្ត បានយំរៀបរាប់ទាំងអារម្មណ៍ក្ដុកក្ដួល និង សោកស្ដាយបំផុត ហើយអ្វីដែលអ្នកគាំទ្រចាប់អារម្មណ៍នោះ ពេល ស្រីភក្រ្ត ចាកចេញ មិនមានបេក្ខជនណាម្នាក់ចុះពីតំបន់មានសុវត្ថិភាពមកជូនដំណើរនាងឡើយ។ ងាកទៅអ្នកគាំទ្រវិញ បន្ទាប់ពីទទួលបានលទ្ធផលពីគណៈកម្មការថា ស្រីភក្រ្ត គឺជាអ្នកចាកចេញពីកម្មវិធីនៅក្នុងសប្ដាហ៍ទី ២៣ នេះ គេឃើញមហាជនអ្នកគាំទ្រជាច្រើនក៏បានបង្ហាញអារម្មណ៍សោកស្ដាយ ចំណែកមួយចំនួនទៀតក៏បានបញ្ចេញមតិពេញចិត្តចំពោះលទ្ធផលមួយនេះ។ សូមចុចទីនេះ ដើម្បីទស្សនាវីដេអូ ៖
