ស្ដាយណាស់! បេក្ខជនមុខស្រដៀងតារាប្រុស TVB ល្បី Bosco Wong អស់ឱកាសដណ្ដើមពាន Cambodian Idol យប់មិញហើយ
និយាយពីបេក្ខជន ទិត សិរិវឌ្ឍនា ចាប់តាំងពីវគ្គ Judge Audition នៃកម្មវិធី Cambodian Idol រដូវកាលទី ៥ ក្រៅពីសមត្ថភាពនៃការបកស្រាយចម្រៀង បេក្ខជនរូបនេះហាក់ឆក់ក្រសែភ្នែកមហាជនអ្នកគាំទ្រលើបណ្ដាញសង្គមខ្លាំងជាមួយនឹងរូបភាពមួយសន្លឹក ជារូបភាពដែលកម្មវិធីប្រកាសលទ្ធផលរបស់លោកអាចឈានទៅវគ្គបន្តនៃកម្មវិធី ដោយមហាជនផ្ទុះចែករំលែកសរសើរខ្លាំងពីរូបសម្រស់ដ៏សង្ហាមានមន្តស្នេហ៍របស់លោក។
លើសពីនេះ អ្វីកាន់តែចាប់អារម្មណ៍ចំពោះមតិសរសើររបស់មហាជនអ្នកគាំទ្រភាគច្រើន គឺបាននិយាយថាកំលោះសង្ហាវ័យ ២០ ឆ្នាំ ទិត សិរិវឌ្ឍនា មានមុខមាត់ស្រដៀងនឹងតារាសម្ដែងប្រុសចិនដ៏ល្បីឈ្មោះលោក Bosco Wong ទៀតផង។
ងាកមកមើលពីសមត្ថភាពរបស់បេក្ខជនរូបសង្ហានេះវិញ ពីមួយសប្ដាហ៍ទៅមួយសប្ដាហ៍ កាន់តែលេចធ្លោជាមួយនឹងការប្រឡងបង្ហាញសមត្ថភាពលើឆាក Cambodian Idol រដូវកាលទី ៥ នេះ ដែលរូបលោកបានក្លាយជាបេក្ខជនដ៏ឆ្នើមមួយរូបនៃកម្មវិធីអាចឈានដល់វគ្គ Live Show សប្ដាហ៍ទី ៥ ក្នុងចំណោមបេក្ខជន ៧ នាក់ចុងក្រោយ។
ដោយឡែក មកដល់វគ្គ Live Show សប្ដាហ៍ទី ៥ នេះដែរ មហាជនអ្នកគាំទ្ររបស់បេក្ខជន ទិត សិរិវឌ្ឍនា ពិតជាមានការសោកស្ដាយជាខ្លាំង ដែលក្នុងវគ្គប្រកាសលទ្ធផលក្នុងសប្ដាហ៍នេះ គឺលោកជាបេក្ខជនមួយរូបជាមួយនឹងបេក្ខជនម្នាក់ទៀត ដែលត្រូវចាកចេញពីកម្មវិធី អស់ឱកាសដណ្ដើមពានរង្វាន់ Cambodian Idol រដូវកាលទី ៥ នេះហើយ៕
