ប្រវត្តិមិនធម្មតា! តាមពិត ND របស់ Miss Grand Myanmar ជាបុរសឯកតំណាងឱ្យប្រទេស សំខាន់មានអាជីពមួយទៀតល្បីខ្លាំង
ក្រោយកម្មវិធី MGI 2024 បញ្ចប់រកឃើញម្ចាស់មកុដ ដែលបានទៅលើ Miss Grand India អ្នកតាមដានបណ្តាញសង្គមទូទាំងពិភពលោក បានងាកមកចាប់អារម្មណ៍ខ្លាំងទៅលើ ND របស់ Miss Grand Myanmar ដែលលោកបានដោះមកុដពីបវរកញ្ញាតំណាងប្រទេសរបស់ខ្លួន អំឡុងពេលនាងឈានចុះពីលើឆាក MGI ។ តាមការស្រាវជ្រាវប្រវត្តិលម្អិត ND រូបនេះមិនត្រឹមតែខ្លាំងក្នុងការកាន់កម្មវិធីក្នុងប្រទេសប៉ុណ្ណោះទេ លោកថែមទាំងជាតារាបង្ហាញម៉ូដ និង ជាបុរសឯកតំណាងឱ្យប្រទេសទៅប្រកួតលើឆាកអន្តរជាតិផងដែរ។
ជាការពិតណាស់ ND ប្រចាំ Miss Grand Myanmar មានឈ្មោះថា Htoo Ant Lwin កើតនៅថ្ងៃទី ០១ ខែវិច្ឆិកា ឆ្នាំ ១៩៩៥ ដែលប៉ុន្មានថ្ងៃទៀតនេះ លោកនឹងឈានចូលអាយុ ២៩ ឆ្នាំហើយ។ មានស្រុកកំណើតនៅទីក្រុងយុំាងហ្គោន (Yangon) លោកជានិស្សិតឆ្នាំទី ២ ផ្នែកច្បាប់នៅសាកលវិទ្យាល័យ Meiktila University។ ជាមួយរូបសម្រស់ មុខមាត់ រាងរៅ សង្ហា សិចស៊ី លោកត្រូវបានគេស្គាល់ជាម៉ូឌែល ជាតារាសម្តែង ជាបុរសឯកក្នុងកម្មវិធីប្រកួតសម្រស់ និង ធ្លាប់តំណាងឱ្យប្រទេសទៅប្រកួតលើឆាកអន្តរជាតិផងដែរ។
នៅក្នុងឆ្នាំ ២០១៦ Htoo Ant Lwin បានប្រកួតឈ្នះក្នុងកម្មវិធី Man of the Year Myanmar 2016 ហើយបានតំណាងឱ្យមីយ៉ាន់ម៉ាទៅប្រកួតលើឆាកអន្តរជាតិ Man of the Year 2016។ ថ្វីបើកម្មវិធីនេះលោកមិនបានឈានដល់ Top 5 តែលោកបានឈ្នះពានរង្វាន់ដល់ទៅពីរគឺ ពានរង្វាន់ Mister Modern និង ពានរង្វាន់ Mister Social Media awards។ មកដល់ឆ្នាំ ២០១៧ លោកបានចូលប្រកួតកម្មវិធី Mister Global Myanmar 2017 ដោយទទួលបានជ័យលាភី 2nd runner-up ឬ លំដាប់រងទី ២។ នៅឆ្នាំ ២០១៧ លោកបានទៅប្រទេសប៉ូឡូញ ដើម្បីតំណាងឱ្យមីយ៉ាន់ម៉ាប្រកួតកម្មវិធីលំដាប់អន្តរជាតិ Mister Supranational 2017 ដោយបានជាប់ត្រឹម Top 20។
ចាប់តាំងពីឆ្នាំ ២០២១ មក លោក Htoo Ant Lwin ត្រូវបានតែងតាំងជានាយកថ្មីប្រចាំស្ថាប័ន Miss Grand Myanmar ដោយទទួលខុសត្រូវជាអ្នករៀបចំកម្មវិធីទាំងក្នុងស្រុក និង បញ្ជូនបេក្ខភាពតំណាងប្រទេសទៅប្រកួតលើឆាកអន្តរជាតិកម្មវិធី Miss Grand International។ ក្នុងឆ្នាំកាន់តំណែងដំបូង លោកបានបញ្ជូន នាង Amara Shune Lei ដែលជា Miss Grand Myanmar 2021 ទៅប្រកួតលើឆាកអន្តរជាតិ និង បានជាប់ត្រឹម Top 20។ ចុងក្រោយនេះ Miss Grand Myanmar 2024 នាង Thae Su Nyein ប្រកួតលើឆាកអន្តរជាតិទទួលបានជ័យលាភីលំដាប់រងទី ២។ ទោះបេក្ខភាពដែលលោកបញ្ជូនមិនទាន់ដណ្តើមបានជ័យលាភីលេខ ១ ក្តី ប៉ុន្តែលោកបានធ្វើឱ្យពិភពលោកបានឃើញពីសក្តានុពលរបស់បវរកញ្ញាមីយ៉ាន់ម៉ា។
ជា ND មានប្រជាប្រិយភាពគួរឱ្យកត់សម្គាល់ Htoo Ant Lwin រមែងបង្ហាញខ្លួនជាតារាម៉ូដែល និង ជាតារាសម្តែងផងដែរ។ អ្វីដែលលើសពីតារាដទៃ លោកត្រូវបានអ្នកនិយមលេងបណ្តាញសង្គមស្គាល់ថា ជាម៉ូឌែលថតរូបភាពសិចស៊ី និង លេងកុនកូនជ្រូកទៀតផង។ បើទោះយ៉ាងនេះក្តី លោកនៅតែមានប្រជាប្រិយភាព និង មានអ្នកគាំទ្រតាមដានមិនចាញ់តារាល្បីៗក្នុងស្រុកឡើយ៕
