មហិច្ឆតាខ្ពស់! ក្រៅពីវិស័យបវរកញ្ញា ជូរី ល្អហួស ប្តេជ្ញានឹងក្លាយជា K-Pop Idol ក្នុងនាមជាកូនខ្មែរ
មហាជននិយមតាមដានសកម្មភាពរបស់បវរកញ្ញាវ័យក្មេង ជូរី ល្អហួស ច្បាស់ជាបានជ្រាបមកហើយថា ក្រៅពីការមានតំណែងជាម្ចាស់មកុដ Miss Preteen Junior Idol World 2024 ហើយនោះ បវរកញ្ញាវ័យក្មេងរូបនេះ ក៏មានទីផ្សារការងារសិល្បៈជាច្រើន ដោយក្នុងនោះ ជូរី ល្អហួស បានក្លាយជាទូតសុឆន្ទៈឱ្យបណ្តាក្រុមហ៊ុននានា ការថតផ្សព្វផ្សាយផលិតផល សម្អាងការ ក៏ដូចជាការចូលរួមក្នុងកម្មវិធីកម្សាន្តនានាជាច្រើន។ មិនត្រឹមតែប៉ុណ្ណោះ ថ្មីៗនេះ ជូរី ល្អហួស ក៏ក្តោបបានតំណែងជាតួឯកក្នុងការសម្តែងខ្សែភាពយន្តថែមទៀតផង។
ជាការពិតណាស់ ជូរី ល្អហួស ត្រូវបានមហាជនទទួលស្គាល់ពីសមត្ថភាពរបស់នាង តាំងពីមុនការចូលរួមប្រកួតលើវិស័យបវរកញ្ញាមកម្ល៉េះ ដោយ ជូរី ល្អហួស មានដុងសិល្បៈដ៏សម្បូរបែប មិនថាតែសម័យ និង បុរាណនោះឡើយ។
ក្នុងនោះ Miss Preteen Junior Idol World 2024 រូបនេះ មានទេពកោសល្យទាំងផ្នែកចម្រៀង រាំសម័យ និង បុរាណរបាំយ៉ាងស្ទាត់ជំនាញ ដែលជាហេតុធ្វើឱ្យមហាជនកោតសរសើរពីរូបនាង ថាពិតជាល្អ ដូចទៅនឹងឈ្មោះណាស់។
យ៉ាងណាមិញ ថ្មីៗនេះ Miss Preteen Junior Idol World 2024 ជូរី ល្អហួស បាន និង កំពុងធ្វើឱ្យអ្នកគាំទ្រមានការភ្ញាក់ផ្អើល និង មោទកភាពជាថ្មីសម្រាប់នាង ដោយនាងបានបង្ហាញមហិច្ឆតា ក្នុងនាមជាកូនខ្មែរ ក្នុងការក្លាយទៅជា K-Pop Idol មួយរូប ក្នុងនាមជាគ្រាប់ពេជ្ររបស់កម្ពុជា។
ក្នុងនោះ ជូរី ល្អហួស បានបង្ហោះសាររៀបរាប់ថា៖ «ថ្ងៃខាងមុខនឹងមានឈ្មោះ កូនស្រីកម្ពុជាឈរលើវិស័យ K-POP IDOL លំដាប់អន្តរជាតិ ដើម្បីឱ្យពិភពលោកស្គាល់កាន់តែច្បាស់ពីកម្ពុជា»៕
