ពូកែមែន! ដាណា ភីន កូនស្រី ថៅកែពេជ្រ ទ្រី ដាណា ប្រឡងបាក់ឌុបបាននិទ្ទេស A ក្នុងឆ្នាំ ២០២៤ នេះ

នៅរសៀលថ្ងៃទី ៣០ ខែតុលា ឆ្នាំ ២០២៤ នេះ ក្រសួងអប់រំ យុវជន និង កីឡា បានប្រកាសលទ្ធផលប្រឡងថ្នាក់មធ្យមសិក្សាទុតិយភូមិ ឆ្នាំ ២០២៤ ដែលលើបណ្ដាញសង្គមហ្វេសប៊ុកកំពុងចែករំលែកអបអរបន្តបន្ទាប់ចំពោះបេក្ខជនប្រឡងជាប់ និង បង្ហាញការសោកស្ដាយចំពោះបេក្ខជនមិនជាប់ផងដែរ។

យ៉ាងណាមិញ ក្រឡេកមើលក្នុងសង្គមសិល្បៈ ក៏ដូចជាបុគ្គលល្បីៗលើវិស័យជំនួញអនឡាញ ក៏មានកូនៗដែលបានប្រឡងមធ្យមសិក្សាទុតិយភូមិ ឆ្នាំ ២០២៤ នេះដែរ ដោយកំពុងបង្ហាញការអបអរចំពោះអ្នកទទួលបានជោគជ័យ។

ក្នុងនោះដែរ គេបានឃើញអ្នកជំនួញអនឡាញល្បីឈ្មោះ ថៅកែហាងពេជ្រ គឺលោកស្រី ទ្រី ដាណា ក៏បានបង្ហោះអបអរសាទរដោយក្ដីរំភើបបំផុត ខណៈកូនស្រីរបស់លោកស្រីទទួលបានលទ្ធផលប្រឡងមធ្យមសិក្សាទុតិយភូមិ ឆ្នាំ ២០២៤ នេះ ជោគជ័យជាប់បាននិទ្ទេស A ទៀតផង។

សារនោះ ថៅកែពេជ្រ ទ្រី ដាណា បានរៀបរាប់ថា ៖ «រំភើបណាស់កូន ដាណាភីន បាននិទ្ទេស A ម៉ាក់ចង់ស្រក់ទឹកភ្នែកហើយ។ ការខិតខំប្រឹងប្រែងរបស់កូនទាំងថ្ងៃទាំងយប់គ្មានពេលសម្រាក ទីបំផុត កូនទទួលបានតាមបំណងហើយ។ នេះជាកាដូធំបំផុតសម្រាប់ម៉ាក់។ កូនធ្វើបានល្អណាស់ សង្ឃឹមថាកូន នឹងខំប្រឹងបន្តទៀតក្នុងជីវិតនៅសាកលវិទ្យាល័យ ដើម្បីជាទំពំាងស្នងឫស្សីដ៏ល្អរបស់សង្គមជាតិ»៕