សុំកម្លាំងចិត្តម្នាក់មួយ! រី សុវណ្ណៈ Mister International Cambodia 2024 ឡើងយន្តហោះទៅប្រកួតនៅហ្វីលីពីនហើយ

មកដល់ពេលនេះរយៈពេល ៣ ខែហើយ ដែលកម្មវិធីបុរសឯក Mister International Cambodia បានប្រកាសជាផ្លូវការនូវម្ចាស់តំណែងថ្មីប្រចាំឆ្នាំ ២០២៤ ដោយបានទៅលើលោក រី សុវណ្ណៈ មានទាំងសមត្ថភាព និង ចំណេះដឹង ដោយនឹងត្រៀមតំណាងប្រទេសចូលរួមប្រកួត Mister International នៅឯប្រទេសហ្វីលីពីន។

យ៉ាងណាមិញ កន្លងមកក្រោយពីកម្មវិធី Mister International Cambodia ប្រកាសបង្ហាញមុខ និង សមាសភាពរបស់ម្ចាស់តំណែង Mister International Cambodia 2024 នេះ ក្រឡេកមើលមហាជនអ្នកគាំទ្រលើហ្វេសប៊ុកបានចែក​រំលែក និង ចូលរួមអបអរដល់ម្ចាស់តំណែងថ្មីរូបនេះផងដែរ។

ជាមួយគ្នានោះ ក្រៅពីបង្ហាញការអបអរសាទរ ក៏ឃើញមានអ្នកលេងបណ្ដាញសង្គមមួយចំនួន បាននិយាយវែកញែកខ្លាំងពីរូបសម្រស់របស់លោក ទាក់ទងនឹងមុខមាត់ រូបរាង ម៉ូដសក់ និង ស្ទីលលេងខ្លួនរបស់លោកទៀតផង ប៉ុន្តែយ៉ាងណាក៏មានមហាជនជាច្រើនបានជួយលើកទឹកចិត្ត និង កម្លាំងចិត្តដល់រូបលោកក្នុងដំណើរការប្រកួតលើឆាកអន្តរជាតិខាងមុខនេះ។

ដោយឡែក មកដល់ថ្ងៃទី ៣១ ខែតុលា ឆ្នាំ ២០២៤ លោក រី សុវណ្ណៈ ក៏បានឡើងយន្តហោះចេញដំណើរទៅប្រទេសហ្វីលីពីនដើម្បីចូលរួមប្រកួត Mister International 2024 ហើយ ដែលឃើញមានវត្តមានបងប្អូន មិត្តភក្តិ និង អ្នកគាំទ្រជាច្រើនបានទៅជូនដំណើរ និង ផ្ដល់កម្លាំងចិត្តដល់បុរសឯករូបនេះ៕