អីយ៉ា! ឈិន ម៉ានិច្ច បណ្ដើរកំលោះសង្ហាម្នាក់ចូលរួមមង្គលការ សុភ័ក្ត្រ កុសុម៉ា សង្ស័យជាគូស្នេហ៍

និយាយពីតារាចម្រៀងស្រី ឈិន ម៉ានិច្ច បានបោះជំហានចូលប្រឡូកក្នុងវិស័យសិល្បៈអស់រយៈពេលប្រមាណជាង ៦ ឆ្នាំមកហើយ ពោលគឺចាប់តាំងពីនាង ដណ្ដើមបានជ័យលាភីលេខ ១ ក្នុងកម្មវិធីប្រឡងចម្រៀងកម្រិតពិភពលោក Cambodian Idol រដូវកាលទី ២។

មកដល់បច្ចុប្បន្ន តារាចម្រៀងដែលប្រសូតចេញពីកម្មវិធី Cambodian Idol រដូវកាលទី ២ រូបនេះ នៅតែក្ដោបបានប្រជាប្រិយភាពពីទស្សនិកជនមិនជិនណាយដដែល ដោយបទចម្រៀងចាស់ថ្មីរបស់ ឈិន ម៉ានិច្ច តែងទទួលបានការគាំទ្រចូលចិត្តស្ដាប់ពីសំណាក់ទស្សនិកជនច្រើនគួរឱ្យកត់សម្គាល់។

លើសពីនោះ ឈិន ម៉ានិច្ច ជាសិល្បការិនីស្រករក្រោយមួយរូបដែលទទួលបានភាពជោគជ័យ មានឈ្មោះល្បាញល្បី ក៏ដូចជាមានមុខជំនួញរកស៊ីក្នុងដៃថែមទៀតផង ប៉ុន្ដែបើនិយាយដល់រឿងស្នេហាវិញ ម៉ានិច្ច ហាក់ស្ងាត់ស្ងៀមមិនព្រមបង្ហាញមុខម្ចាស់បេះដូងឱ្យអ្នកគាំទ្របានស្គាល់ទាល់តែសោះ។

ដោយឡែកស្រាប់តែ កាលពីថ្ងៃទី ០៤ ខែវិច្ឆិកា ឆ្នាំ ២០២៤ ពោលគឺថ្ងៃមង្គលការរបស់ពិធីការិនី សុភ័ក្ត្រ កុសុម៉ា គេឃើញកញ្ញា ឈិន ម៉ានិច្ច បានបណ្តើរកំលោះសង្ហាមួយរូបចូលរួមកម្មវិធីជាមួយ មើលទៅពិតជាមានភាពស្និទ្ធស្នាលយ៉ាងខ្លាំង។ លើសពីនោះ អ្វីដែលគួរឱ្យចាប់អារម្មណ៍ គឺរូបថតមួយសន្លឹក ដែលកញ្ញា ឈិន ម៉ានិច បង្ហោះអបអរសាទរដល់កូនក្រមុំនោះ គឺកាន់ដៃនឹងកំលោះសង្ហារូបនោះមិនលែងដូចជាគូស្នេហ៍យ៉ាងដូច្នោះ៕