មិនធម្មតា! ប៉ៃ ដាវីឌ និង មុនិនាថ កំពុងផ្ទុះគាំទ្រលើការ Cover បទល្បីៗ ក្រោយគ្មានវាសនាលើកពាន Beat The Best
មហាជនអ្នកតាមដានទស្សនាកម្មវិធីប្រឡងចម្រៀងកម្រិតពិភពលោក Beat The Best រដូវកាលទី ២ ច្បាស់ជាស្គាល់ហើយពីលោក ប៉ៃ ដាវីឌ និង កញ្ញា សោម មុនិនាថ ដែលសុទ្ធតែជាអតីតបេក្ខភាពដ៏ឆ្នើមនៃកម្មវិធី ដ្បិតតែអ្នកទាំងពីរមិនទទួលបានជោគជ័យក្នុងការប្រឡងនេះមែន ប៉ុន្តែក៏ទទួលបានការស្រឡាញ់គាំទ្រខ្លាំងពីមហាជនជាមួយនឹងសមត្ថភាពសំឡេងយ៉ាងពីរោះរណ្ដំរបស់អ្នកទាំងពីរ។
ក្រោយពីបរាជ័យក្នុងកម្មវិធីប្រឡងចម្រៀងលំដាប់ពិភពលោកនេះ រយៈពេលប៉ុន្មានខែកន្លងមក គេឃើញថាអតីតបេក្ខភាពទាំងពីររូបនេះ ក៏កំពុងបន្តដើរលើវិថីចម្រៀងនេះដដែលជាមួយនឹងសមត្ថភាពនៃទឹកដមសំឡេងយ៉ាងក្រអួនក្រអៅរបស់អ្នកទាំងពីរ ដែលឃើញលេចមុខលើឆាកប្រគំតន្រ្តីតូចធំ និង ត្រូវគេអញ្ជើញទៅច្រៀងនៅឆាកប្រគំតន្រ្តីក្នុងភោជនីយដ្ឋានផ្សេងៗផងដែរ។
ជាក់ស្ដែង មួយរយៈថ្មីកន្លងទៅ ប្រុសសង្ហាស្រីស្អាតអតីតបេក្ខភាព Beat The Best រដូវកាលទី ២ នេះ បានធ្វើឱ្យមហាជនអ្នកលេងបណ្ដាញសង្គមផ្ទុះចាប់អារម្មណ៍ និង ចែករំលែកខ្លាំងចំពោះវីដេអូចម្រៀងមួយ ដែល ប៉ៃ ដាវីឌ និង សោម មុនិនាថ បានច្រៀង Cover បទ «ស្នេហ៍ ១០០០ ឆ្នាំ» លើឆាកប្រគំតន្រ្តី ពីរោះរណ្ដំខ្លាំងឆក់អារម្មណ៍អ្នកស្ដាប់ឱ្យសរសើរ និង ស្រឡាញ់សំឡេងរបស់អ្នកទាំងពីរយ៉ាងខ្លាំង។
វីដេអូនៃបទចម្រៀង ដែល ប៉ៃ ដាវីឌ និង សោម មុនិនាថ បានច្រៀង Cover បទ «ស្នេហ៍ ១០០០ ឆ្នាំ» និង បទល្បីៗពីរោះៗជាច្រើនទៀត ត្រូវបានអ្នកលេងបណ្ដាញសង្គមបង្ហោះចែករំលែកបន្តគ្នាទាំងក្នុង YouTube, TikTok និង ហ្វេសប៊ុក ព្រមទាំងបានបញ្ចេញមតិសរសើរ និង ជំរុញលើកទឹកចិត្តដល់រូបអ្នកទាំងពីរចេញបទចម្រៀងផ្ទាល់ខ្លួនទៀតផង៕
