សិល្បកររៀមច្បងច្រើនរូប ស្រុះដៃគ្នាជួយជ្រោមជ្រែងក្នុងការបោះឆ្នោះឱ្យ ប្រាសាទ ដាវីន ជាប់ Top10 Voice For Change
ចំពោះដំណើរនៃកម្មវិធីអន្តរជាតិដ៏អស្ចារ្យ Miss Universe 2024 លើកទី ៧៣ មកដល់ពេលនេះ កំពុងដំណើរការប្រកួតលើវិញ្ញាសាជាបន្តបន្ទាប់សម្រាប់បេក្ខភាពបវរកញ្ញា និង មានការជួបជុំគ្នា ដើរទស្សនកិច្ចផ្សេងៗ ព្រមទាំងកំពុងតែបង្ហាញសមត្ថភាពហ្វឹកហាត់បន្ថែមទម្រាំដល់ថ្ងៃប្រកួតផ្ដាច់ព្រ័ត្រនៅថ្ងៃទី ១៦ ខែវិច្ឆិកា ឆ្នាំ ២០២៤ ខាងមុខ។
ក្រឡេកទៅចាប់អារម្មណ៍បវរកញ្ញាកម្ពុជា អ្នកនាង ប្រាសាទ ដាវីន វិញ ក៏កំពុងត្រូវបានមហាជនអ្នកគាំទ្រចាប់អារម្មណ៍សរសើរពីសកម្មភាពរបស់អ្នកនាង ដែលបវរកញ្ញាដ៏មានសក្កានុពលរូបនេះ មានភាពជឿជាក់ ស្វាហាប់ខ្លាំងក្នុងដំណើរការប្រកួតទាំងទំនាក់ទំនង ទាំងការប្រើប្រាស់ភាសាផ្សេងៗ។
ងាកមកមើលមហាជនអ្នកគាំទ្រវិស័យបវរកញ្ញាកម្ពុជាលើបណ្ដាញសង្គមវិញ ក៏កំពុងបង្ហោះចែករំលែកនូវសកម្មភាពរបស់បវរកញ្ញា ប្រាសាទ ដាវីន ភ្ជាប់ជាមួយនឹងក្ដីមោទកភាពស្ងើចសរសើរ និង ជួយលើកទឹកចិត្តជាបន្តបន្ទាប់ចំពោះនាងក្នុងដំណើរការប្រកួតលើឆាកអន្តរជាតិដ៏អស្ចារ្យនេះ។
ស្របពេលកម្មវិធីកំពុងដំណើរការប្រកួតនេះដែរ មហាជនអ្នកគាំទ្រវិស័យបវរកញ្ញា ជាពិសេសសិល្បករកម្ពុជាជាច្រើនរូបកំពុងខ្នះខ្នែងខ្លាំងទាក់ទងនឹងដំណើរការបោះឆ្នោតឱ្យ ប្រាសាទ ដាវីន ខណៈកម្មវិធី Miss Universe មានការបើកឱ្យបោះឆ្នោតគាំទ្រចំពោះបេក្ខភាពបវរកញ្ញាតំណាងប្រទេសនីមួយៗ ដើម្បីឈ្នះពានរង្វាន់ Top 10 Voice For Change ដែលអាចទទួលបានជ័យលាភីពានមាស និង ប្រាក់ ក្នុងចំណោមប្រទេសទាំង ១០។
ក្នុងនោះ តាមរយៈការចែករំលែកបន្តលើហ្វេសប៊ុកផេករបស់អ្នកនាង ប្រាសាទ ដាវីន បានឃើញមានរៀមច្បងអ្នកសិល្បៈជាច្រើនរូប បានបង្ហោះសារ និង ចេញវីដេអូ និយាយលើកទឹកចិត្តដល់បវរកញ្ញាកម្ពុជារូបនេះ ព្រមទាំងអំពាវនាវជ្រោមជ្រែងលើការបោះឆ្នោះឱ្យ ប្រាសាទ ដាវីន បាន Top 10 Voice For Change នៃកម្មវិធី Miss Universe នេះដែរ៕
