ទោះមិនបានលើកពាន! ម៉ាលីន ទទួលបានការគាំទ្រខ្លាំង ជាពិសេសកម្លាំងចិត្តពេញទីពីបុរសមុខស្មើ ដាឡែត

ក្រោយពីប្រកួតតាំងពីវគ្គជម្រុះតាមបណ្តាខេត្ត ដើម្បីស្វែងរក Top 25 មកបង្ហាញសមត្ថភាពក្នុងចង្ក្រាន MasterChef Cambodia រដូវកាលទី ៣ និង ប្រកួតអស់ជាច្រើនសប្តាហ៍ ទីបំផុតកម្មវិធីប្រកួតចម្អិនម្ហូបលំដាប់ពិភពលោកមួយនេះ បានរកឃើញម្ចាស់ពានហើយ។

ក្នុងនោះដែរ ម្ចាស់ពាន MasterChef Cambodia រដូវកាលទី ៣ បានទៅលើ លោក ឃួន សំអន ខណៈ Top 2 បានទៅលើ អ្នកនាង លីម លីនដា និង Top 3 បានទៅលើ កញ្ញា ឆៃ តារាម៉ាលីន។

ដោយឡែក ក្រឡេកមកមើល កញ្ញា ឆៃ តារាម៉ាលីន ឯណោះវិញ ខណៈប្រឹងប្រែងមកដល់វគ្គផ្តាច់ព្រ័ត្រក៏ពិតមែន ប៉ុន្តែនាងបានធ្វើឱ្យបាត់បង់ឱកាសក្នុងការដណ្តើមពាននារដូវកាលនេះ ធ្វើឱ្យខ្លួនឯងមានការសោកស្តាយយ៉ាងខ្លាំង។ តែយ៉ាងណាក៏ដោយ បើទោះជាមិនបានលើកពានក៏ពិតមែន ប៉ុន្តែ កញ្ញា ឆៃ តារាម៉ាលីន ត្រូវបានបេក្ខជនរួមប្រកួត និង អ្នកគាំទ្រសរសើរដល់រូបនាង ដែលបានមកដល់វគ្គនេះ។

ម្យ៉ាងវិញទៀត ស្របពេលមានការសោកស្តាយ កញ្ញា ម៉ាលីន ក៏ទទួលបានការលើកទឹកចិត្តពីសំណាក់មហាជន ជាពិសេសនោះ គឺក្រុមគ្រួសារ ក៏ដូចជាមនុស្សជាទីស្រឡាញ់របស់នាង គឺលោក ចៅ ដាឡែត​ ផងដែរ។

ងាកមកបុរសមុខស្មើ លោក ចៅ ដាឡែត វិញ ក៏បានបង្ហោះសារផ្ញើជូនទៅដល់កញ្ញា ម៉ាលីន ធ្វើឱ្យអ្នកគាំទ្រឃើញហើយញញឹមមិនមាត់មិនជិតនោះឡើយ។ សារនោះ លោក ដាឡែត រៀបរាប់ថា៖ «You Did a great job dear little one. I always respected and admired this little girl for her energy» ដែលមានអត្ថន័យថា៖ «អ្នកធ្វើបានល្អហើយ ក្មេងតូច! ខ្ញុំតែងតែគោរព និង កោតសរសើរក្មេងស្រីតូចម្នាក់នេះ ចំពោះថាមពលរបស់នាង»។

ភ្លាមនោះមិនបង្អង់ កញ្ញា ម៉ាលីន ក៏បានចូលទៅខមមិនឆ្លើយតបទៅកាន់លោក ដាឡែត ភ្លាមៗថា៖ «អរគុណបងខ្លាំងណាស់ អរគុណបងគ្រប់យ៉ាង! បងជាមនុស្សប្រុស ដែលតែងផ្តល់ភាពកក់ក្តៅដល់ខ្ញុំគ្រប់ពេល»៕