ស្ងាត់ៗតែច្បាស់លាស់! Paing Takhon លើកចិញ្ចៀនពេជ្រធំប៉ុនគ្រាប់ល្មុត លុតជង្គង់សុំមិត្តស្រីរៀបការយ៉ាងរ៉ូមេនទិក នៅកូរ៉េខាងត្បូង

កាលពីថ្ងៃទី ១០ ខែតុលា ឆ្នាំ ២០២៤ កន្លងទៅ តារាម៉ូដែល និង ជាតារាសម្ដែងប្រុសមីយ៉ាន់ម៉ាដ៏មានប្រជាប្រិយភាព Paing Takhon បានធ្វើឱ្យមហាជនអ្នកគាំទ្ររបស់លោកជាច្រើនភ្ញាក់ផ្អើល និង មានក្ដីរំភើបជំនួសរូបលោកជាខ្លាំង ក្រោយតារាប្រុសរូបនេះបានបង្ហោះវីដេអូលើបណ្ដាញសង្គមផ្ទាល់ខ្លួនរបស់លោក ទាំង Instagram, Facebook និង Youtube ដែលជាវីដេអូដ៏រ៉ូមេនទិកនៃសកម្មភាពរបស់លោកលុតជង្គង់សុំមិត្តស្រីរៀបការ។

តាមរយៈវីដេអូនោះដែរ ឃើញថាដំបូងៗឡើយលោក និង មិត្តស្រី ឈរនិយាយគ្នាធម្មតានៅតាមដងទន្លេ Han នៃប្រទេសកូរ៉េខាងត្បូង ប៉ុន្តែមួយសន្ទុះក្រោយមក លោកបានធ្វើឱ្យមិត្តស្រីភ្ញាក់ព្រើតរំភើបរហូតហូរទឹកភ្នែកដោយលោកបានលូកទាញយកប្រអប់ចិញ្ចៀនពីហោប៉ៅបើកបង្ហាញចិញ្ចៀនពេជ្រមួយវង់យ៉ាងធំប៉ុនគ្រាប់ល្មុតលុតជង្គង់សុំមិត្តស្រីដ៏ស្រស់សោភារៀបការយ៉ាងផ្អែមល្ហែមជាទីបំផុត។

វីដេអូទាំងស្រុងនៃការសុំមិត្តស្រីរៀបការនេះដែរ បានធ្វើឱ្យអ្នកគាំទ្ររបស់តារាសម្ដែងប្រុស Paing Takhon ជាច្រើនសម្ដែងក្ដីរំភើបអបអរសាទរ និង ជូនពរឱ្យពួកគេទាំងពីរមានតែក្ដីសុខសុភមង្គលពោរពេញដោយស្នាមញញឹម៕