របូតពាន Cambodian Idol បានទៅលើ គី សាវីន ស្រាប់តែ អ៊ុំ សិរីគុត្តា ផុសសារផ្ដាំផ្ញើអ្នកគាំទ្ររឿងមួយ

កាលពីរាត្រីថ្ងៃទី ១០ ខែវិច្ឆិកា ឆ្នាំ ២០២៤ កន្លងទៅនេះ កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី ៥ បានឈានដល់វគ្គផ្ដាច់ព្រ័ត្រ និង ជារាត្រីដ៏រំភើបចិត្តសម្រាប់អ្នកគាំទ្រវិស័យចម្រៀង ដែលកម្មវិធីបានរកឃើញនូវម្ចាស់ជ័យលាភីប្រចាំរដូវកាលថ្មីនេះហើយ គឺបានទៅលើលោក គី សាវីន។

ដោយឡែក បើក្រឡេកទៅចាប់អារម្មណ៍ចំពោះបេក្ខនារីជើងខ្លាំង Top 3 អ៊ុំ សិរីគុត្តា វិញ ត្បិតតែនាងពុំបានក្លាយជាម្ចាស់ជ័យលាភីក៏ពិតមែន ប៉ុន្តែបេក្ខនារីរូបនេះ បានឈ្នះចិត្តមហាជនស្ទើរទូទាំងប្រទេសដែលរាល់ការបង្ហាញសមត្ថភាពរបស់នាង តែងឆក់បេះដូងឱ្យស្រឡាញ់គាំទ្រ និង សរសើររូបនាងយ៉ាងខ្លាំងក្លាជាមួយសមត្ថភាពដ៏ពូកែលេចធ្លោរបស់នាង។

ពិតណាស់ សឹងតែគ្រប់សប្ដាហ៍កន្លងមកបេក្ខនារីដ៏ឆ្នើមរូបនេះ មិនដែលធ្វើឱ្យមហាជនខកបំណងឡើយ ដោយនាងតែងបង្ហាញនូវសមត្ថភាពបានល្អទាក់ទាញត្រូវបានអ្នកគាំទ្ររំពឹងខ្ពស់ថានាងអាចនឹងមានឱកាសលើកពានទៀតផង ជាពិសេសក្នុងរាត្រីផ្ដាច់ព្រ័ត្រកាលពីថ្ងៃ ១០ ខែវិច្ឆិកា កន្លងទៅ កញ្ញាក៏ជាបេក្ខភាពមួយរូបដែលលេចធ្លោ និង អស្ចារ្យខ្លាំងបន្ទាប់​ពី​ម្ចាស់​ជ័យលាភីផងដែរ។

ក្រោយពីបញ្ចប់ការប្រកួតកម្មវិធី Cambodian Idol រដូវកាលទី ៥ នេះដែរ ងាកទៅមើលហ្វេសប៊ុកផេករបស់បេក្ខនារីរូបនេះ ក៏បានបង្ហោះសារបង្ហាញការអរគុណចំពោះកម្មវិធីទាំងមូល និង ការគាំទ្រលើកទឹកចិត្តរបស់មហាជនអ្នកគាំទ្រជាច្រើន ដ្បិតតែនាងមិនបានសម្រេចក្ដីប្រាថ្នា តែនាងក៏ពេញចិត្ត និង សន្យាដើរលើវិស័យនេះនាំយកអ្វីថ្មីៗសម្រាប់អ្នកគាំទ្ររបស់នាងផងដែរ។

ក្នុងនោះ អ៊ុំ សិរីគុត្តា បានរៀបរាប់ថា ៖ «ការចាប់ផ្តើម និង បញ្ចប់ដ៏សែនមានន័យក្នុងការប្រកួតប្រជែង ក្នុងកម្មវិធី CAMBODIAN IDOL SEASON 5 នេះ ទោះជានាងខ្ញុំមិនអាចសម្រេចក្តីប្រាថ្នាខ្លួនឯងបាន ក៏ក្មេងស្រីម្នាក់នេះសន្យា​ និង បម្រើអារម្មណ៍ពុកម៉ែបងប្អូនទាំងអស់គ្នា ជាមួយសំឡេង​ដែលខ្ញុំមានជារៀងរហូតតទៅ​ ហើយថានឹងមានអ្វីដែលថ្មីប្លែកដើម្បីឱ្យពុកម៉ែបងប្អូន​ ចងចាំក្មេងស្រីម្នាក់នេះទុកជាប់ក្នុងចិត្តរហូត។​ ខ្ញុំលើកម្រាមដៃ ១០ អរគុណ ទៅថ្នាក់ដឹកនាំបងៗក្រុមការងារ ទាំងលោកគ្រូភ្លេង និង ជាពិសេសគឺ Judge ទាំង 4 រូបដែលបាន ផ្តល់ជាដំបូន្មានល្អៗ ផ្តល់ការស្រឡាញ់ ផ្តល់ទាំងទំនុកចិត្ត យកចិត្តទុកដាក់លើបេក្ខភាពទាំងអស់​ ដោយចេញពីបេះដូង​។ ជាចុងក្រោយ ក៏អរគុណដល់អ្នកគាំទ្រ អ៊ុំ​ សិរីគុត្តា ទាំងអស់ផង ដែលស្រលាញ់ចូលចិត្តក្មេងស្រីម្នាក់នេះតាំងពីដើមរហូតមកដល់ពេលនេះ»។

លើសពីនេះ អ៊ុំ សិរីគុត្តា ក៏បានចែករំលែកសូមឱ្យអ្នកគាំទ្របង្ហាញការអបអរលើកទឹកចិត្តដល់ម្ចាស់ជ័យលាភី Cambodian Idol រដូវកាលទី ៥ លោក គី សាវីន ដែលពិតជាស័ក្តិសមបំផុតផងដែរថា ៖ «ការប្រឡងបាន​បញ្ចប់ហើយ ​យើងគួរតែ​លើកទឹកចិត្តគាត់​ គាត់ពិតជាស័ក្តិសម ជាការស្របតាមការសម្រេចចិត្តរបស់ពុកម៉ែបងប្អូនទូទាំងប្រទេស អបអរសាទរ សាវីន»៕