វណ្ណដា បង្ហាញតារារៀមច្បងក្នុងចិត្ត ២ រូប ដែលលោកស្រមៃចង់សហការច្រៀងជាមួយ

ទាក់ទងនឹងប្រជាប្រិយភាពរបស់កំពូលតារាចម្រៀងរ៉េប វណ្ណដា បច្ចុប្បន្នកាន់តែទទួលបានភាពជោគជ័យខ្លាំងក្នុងវិស័យចម្រៀងពីមួយថ្ងៃទៅមួយថ្ងៃ ដែលមានសន្ទុះនៃការស្រឡាញ់គាំទ្រពីយុវវ័យគ្រប់ស្រទាប់ខ្លាំងឡើង។

អ្នកគាំទ្រសុទ្ធសឹងតែបានដឹងហើយថា កំពូលតារាចម្រៀងរ៉េបវ័យក្មេងដ៏ល្បីល្បាញរូបនេះ មានសមត្ថភាពខ្ពស់ក្នុងវិស័យចម្រៀងទាំងការច្រៀង រ៉េប និពន្ធបទចម្រៀង បទភ្លៀង និង បង្កើតស្នាដៃបទចម្រៀងថ្មីៗ ឆក់ការគាំទ្រខ្លាំងពីមហាជនខ្មែរ ព្រមទាំងល្បីល្បាញដល់ក្រៅប្រទេសទៀតផង។

លើសពីនេះ មិនត្រឹមតែឆក់បានក្ដីស្រឡាញ់ពីមហាជនអ្នកគាំទ្រនោះទេ តារាចម្រៀងរ៉េបវ័យក្មេងដ៏ល្បីរូបនេះ ក៏ទទួលបានការគោរពស្រឡាញ់ពីអ្នកសិល្បៈជំនាន់ក្រោយ និង រៀមច្បងជាច្រើនរូប ដែលចូលចិត្តស្រឡាញ់ និង សរសើរពីស្នាដៃរបស់លោកដែរ។ រីឯរូបលោកវិញ ក៏តែងធ្វើឱ្យអ្នកគាំទ្រស្ងប់ស្ងែងពីអត្តចរិតដ៏គួរឱ្យស្រឡាញ់របស់លោក បង្ហាញការគោរពស្រឡាញ់ឱនលំទោនចំពោះសិល្បកររៀមច្បងគ្រប់រូប។

យ៉ាងណាមិញ បើតាមរយៈការទម្លាយប្រាប់មហាជនអ្នកគាំទ្រទាក់ទងនឹងទំនាក់ទំនងលើវិស័យចម្រៀងរបស់ខ្លួន កន្លងមកកំពូលតារាចម្រៀង វណ្ណដា ក៏ធ្លាប់ប្រាប់ឱ្យដឹងថាតារាចម្រៀងរៀមច្បងក្នុងស្រុក ដែលនៅក្នុងចិត្តរបស់លោក និង ស្រមៃចង់សហការច្រៀងជាមួយនោះ មានរៀមច្បងកំពូលតារាចម្រៀងស្រី ឱក សុគន្ធកញ្ញា និង តារាចម្រៀងប្រុសរៀមច្បងមួយរូបទៀត ដែលទើបតែបង្ហាញលើហ្វេសប៊ុក គឺជាតារាចម្រៀងជើងចាស់លោក ណូយ វ៉ាន់ណេត ផងដែរ៕