ដូចឱ្យប្រផ្នូល! ធ្លាយវីដេអូចាស់មួយរបស់ Song Jae Rim ប្រាប់ពីបំណងមួយចង់ឱ្យកើតមានក្នុងបុណ្យស-ពលោក
វីដេអូចាស់មួយរបស់ Song Jae Rim កាលពីឆ្នាំ ២០២២ អំឡុងពេលលោកផ្ដល់បទសម្ភាសមួយ channel មួយឈ្មោះ MK Studio ត្រូវបានមហាជនគាស់កកាយឡើងមកវិញរហូតមានការផ្ទុះចាប់អារម្មណ៍ជាខ្លាំង។
ក្នុងកិច្ចសម្ភាសនោះដែរ Song Jae Rim ត្រូវបានសួរពីអ្វីដែលលោកមានបំណងចង់ធ្វើក្នុងជីវិតនេះ ហើយចម្លើយដ៏គួរឱ្យភ្ញាក់ផ្អើលនោះ គឺលោកបានឆ្លើយតបថា៖ «វាស្ដាប់ទៅរៀងហួសហេតុបន្តិច ប៉ុន្តែខ្ញុំចង់ឱ្យគ្រប់គ្នាផឹកស្រាសាំប៉ាញ (champagne) ក្នុងថ្ងៃបុណ្យសពរបស់ខ្ញុំ។ មានពិធីបុណ្យសពមួយដ៏រីករាយគឺជាបំណងមួយក្នុងបញ្ជីអ្វីដែលខ្ញុំចង់ធ្វើ (bucket list)»។ សំណួរក៏បានបន្តទៀតថា៖ «ពេលប្រឈមមុខនឹងសេចក្ដីស្លាប់ តើនរណាដែលលោកគិតដល់មុនគេ?» Song Jae Rim បានតបថា៖ «ប្រាកដជាឪពុកម្ដាយរបស់ខ្ញុំហើយ តែខ្ញុំមិនអាចទៅមុនពួកគាត់នោះទេ»។
កិច្ចសម្ភាសមួយនេះដែរ បានផ្ទុះចែករំលែកឡើងវិញក្រោយការស្លាប់ភ្លាមៗរបស់លោក ដែលកាន់តែធ្វើឱ្យមហាជនក៏ដូចជាអ្នកគាំទ្រកាន់តែស្រណោះសោកសៅថែមទៀត។ គួររំឭកថា កាលពីរសៀលថ្ងៃទី ១២ ខែវិច្ឆិកា ឆ្នាំ ២០២៤ កន្លងទៅ តារាសម្ដែងប្រុស Song Jae Rim ត្រូវបានប្រទះឃើញស្លាប់ក្នុងផ្ទះរបស់លោកក្នុងសង្កាត់ Seongdong ក្រុងសេអ៊ូល ប្រទេសកូរ៉េខាងត្បូង។ នៅទីតាំងកើតហេតុនោះដែរ ប៉ូលិសក៏បានរកឃើញសំបុត្របណ្ដាំសរសេរលើក្រដាស A4 ចំនួន ២ ទំព័រផងដែរ។ យ៉ាងណាមិញ ចំពោះមូលហេតុនៃការស្លាប់របស់លោក ខាងក្រុមគ្រួសារមិនទម្លាយបញ្ជាក់នៅឡើយទេ។
ពិធីបុណ្យសពរបស់ Song Jae Rim នឹងរៀបចំធ្វើឡើងនៅវេលាម៉ោង ១២ ថ្ងៃត្រង់ ថ្ងៃទី ១៤ ខែវិច្ឆិកា ឆ្នាំ ២០២៤ ខាងមុខ (ពេលវេលាក្នុងតំបន់) នាបន្ទប់លេខ ២ នៃទីតាំងរៀបចំបុណ្យសព Mary’s Hospital Funeral Home ក្នុងតំបន់ Yeouido ហើយមឈូសរបស់លោកនឹងយកទៅបញ្ចុះនៅកន្លែងបញ្ចុះសព Seunhwawon ក្រុងសេអ៊ូល៕
