(វីដេអូ) ផ្ទុះផ្អើល! បេក្ខជន Rapper Fighter ១ រូប យកបារ៉ូលចម្រៀង Zedes ទៅប្រកួត ពេលនេះសាមីខ្លួនចេញមុខសុំទោសហើយ
កាលពីពេលថ្មីៗនេះ អ្នកនិយមតាមដានវិស័យចម្រៀងរ៉េប ជាពិសេសការប្រកួតក្នុងកម្មវិធី Rapper Fighter ហាក់មានការចាប់អារម្មណ៍យ៉ាងខ្លាំង បន្ទាប់ពីការបង្ហាញសមត្ថភាពរបស់បេក្ខជនកាលពីថ្ងៃទី ១៧ ខែវិច្ឆិកា ឆ្នាំ ២០២៤ វគ្គ FIGHTER SPIRIT សប្តាហ៍ទី៦។
យ៉ាងណាមិញ ក្រោយពីការប្រកួតក្នុងសប្តាហ៍ខាងលើហើយ ស្រាប់តែនៅថ្ងៃទី ១៨ ខែវិច្ឆិកា ឆ្នាំ ២០២៤ លោក Zedes ដែលគេស្គាល់ជាបេក្ខជន Top 2 កម្មវិធី The Rapper Cambodia រដូវកាលទី ១ បានចេញមកបង្ហោះសារ ថាបេក្ខជនមួយរូបឈ្មោះ LO MA បានយកបារ៉ូលចម្រៀងរបស់លោកទៅច្រៀងក្នុងការប្រកួតដោយមិនបានសុំការអនុញ្ញាត។
ក្នុងនោះ លោក Zedes បានរៀបរាប់ថា៖ «បទ ដែលខ្ញុំធ្វើវាអស់ពេលជិត ៤ ឆ្នាំ ត្រូវបានបុគ្គលម្នាក់នេះ LO MA បំផ្លាញ ដោយយកបារ៉ូលពីបទខ្ញុំទៅដាក់ក្នុងបទប្រលងរបស់ខ្លួនឯង ធ្លាប់សុំខ្ញុំដែរ តែខ្ញុំមិនព្រម រួចក៏លួចចឹងហ្មងទៅមែន? យកបារ៉ូលរបស់គេទៅប្រលងចឹង គិតថាឡូយមែនប្រូ?»។
ដោយឡែកក្រោយពីការបង្ហោះសារពីលោក Zedes ហើយនោះ ក៏ផ្ទុះការវែកញែកពេញបណ្តាញសង្គមពីសំណាក់អ្នកស្នេហាវិស័យចម្រៀងរ៉េបរហូតដល់យប់ថ្ងៃដដែល លោក LO MA បេក្ខជន Rapper Fighter បានចេញមកបង្ហោះវីដេអូ សុំទោសទៅដល់លោក Zedes ជាសាធារណៈ។
ទន្ទឹមនឹងវីដេអូនោះដែរ លោក LO MA ក៏បានសរសេរសារថា ៖ «ខ្ញុំសូមធ្វើការសុំទោសទៅកាន់ Zedes ចំពោះបារ៉ូលមួយចំនួន ដែលខ្ញុំបានយកមកដាក់បញ្ចូលក្នុងថ្ងៃប្រកួតដោយមិនបានគិតវែងឆ្ងាយ ហើយសុំទោសទៅដល់អ្នកគាំទ្រ ដែលខ្ញុំធ្វើឱ្យអ្នកទាំងអស់គ្នាខកចិត្ត សុំទោស Coach King Chi និង កម្មវិធីទាំងមូលផងដែរ»៕
សូមទស្សនា វីដេអូខាងក្រោម៖
