ដល់វគ្គ Miss Planet ហើយ! ដេត ស្រីនាឌ ចូលដល់កងប្រកួត MPI ពេលនេះកំពុងត្រៀមខ្លួនបំបុកយកមកុដជូនកម្ពុជា
ក្រោយពីគ្រងតំណែងជា Miss Planet Cambodia 2024 កញ្ញា ដេត ស្រីនាឌ ត្រូវត្រៀមខ្លួនដើម្បីបំពេញបេសកម្មលើឆាកអន្តរជាតិ Miss Planet International លើកទី ៤ ដែលប្រព្រឹត្តឡើងនៅថ្ងៃទី ១៩ ដល់ថ្ងៃទី ២៧ ខែវិច្ឆិកា ឆ្នាំ ២០២៤ នេះ ដោយកម្ពុជាធ្វើជាម្ចាស់ផ្ទះ។
ពិតណាស់ មួយរយៈកន្លងមក ខណៈការប្រកួតលើឆាកអន្តរជាតិកាន់តែកៀកមកដល់ បវរកញ្ញា ដេត ស្រីនាឌ បានបង្ហាញការត្រៀមខ្លួនយ៉ាងមោះមុត និង កាន់តែពង្រឹងសមត្ថភាពរបស់ខ្លួនកាន់តែខ្លាំង ហ្វឹកហាត់ទាំងការដើរ ទាំងចំណេះដឹងទូទៅ ភាសា និង សមត្ថភាពផ្សេងៗ។
ដោយឡែក ក្រោយពីបានត្រៀមខ្លួនរួចជាស្រេច និង មោះមុតខ្លាំង មកដល់ថ្ងៃទី ១៩ ខែវិច្ឆិកា ឆ្នាំ ២០២៤ នេះ បវរកញ្ញា ដេត ស្រីនាឌ ក៏បានរៀបចំខ្លួនចូលកងប្រកួត Miss Planet International 2024 ហើយ ដែលបានទៅកន្លែងស្នាក់ និង ជុំជួបបេក្ខភាពបវរកញ្ញាដទៃទៀតដែលធ្វើដំណើរពីបណ្ដាប្រទេសផ្សេងៗមកកាន់ទឹកដីកម្ពុជាចូលរួមប្រកួតកម្មវិធីអន្តរជាតិនេះ។
ទន្ទឹមនឹងនេះ មហាជនអ្នកគាំទ្រវិស័យបវរកញ្ញាកម្ពុជាជាច្រើន កំពុងបង្ហាញការចូលរួមលើកទឹកចិត្ត ផ្ដល់កម្លាំងចិត្ត និង ជូនពរដល់បវរកញ្ញា ដេត ស្រីនាឌ ទទួលបានលទ្ធផលល្អក្នុងដំណើរការប្រកួតនេះផងដែរ៕
