លោក អ៊ិន សុភិន ទម្លាយមាន ៣០០ អាខោនហ្វេសប៊ុកឆាតទៅជេ.រ ក្រោយក្មួយស្រីបង្កើតឈ្នះ Miss Global Cambodia 2024
នៅរាត្រីថ្ងៃទី ២០ ខែវិច្ឆិកា ឆ្នាំ ២០២៤ កម្មវិធីប្រកួតសម្រស់ Miss Global Cambodia 2024 បានប្រកាសរកឃើញរាជិនីគ្រងមកុដហើយ គឺបានទៅលើកញ្ញា ខុន ស្រីខួច ជាបេក្ខនារីតំណាងឱ្យខេត្តបាត់ដំបង។
ក្នុងនោះ អ្វីដែលគួរឱ្យចាប់អារម្មណ៍ បន្ទាប់ពីកម្មវិធីប្រកួតសម្រស់មួយនេះ ប្រកាសនូវរាជិនីគ្រងមកុដថ្មីដែលបានទៅលើបវរកញ្ញា ខុន ស្រីខួច ក្នុងនោះគេក៏បានឃើញ លោក អ៊ិន សុភិន បានចេញមុខផុសសារអបអរសាទរដល់នាង ហើយលោកថែមទាំងបានបញ្ជាក់ថា Miss Global Cambodia ថ្មីនេះ គឺត្រូវជាក្មួយស្រីបង្កើតរបស់លោកថែមទៀតផង។
ភ្លាមនោះ ក្រោយពីបានប្រាប់ថា Miss Global Cambodia 2024 កញ្ញា ខុន ស្រីខួច ជាក្មួយស្រីបង្កើតហើយនោះ លោក អ៊ិន សុភិន បានបង្ហោះសារថា លោកត្រូវបានគណនីហ្វេសប៊ុកប្រមាណជា ៣០០ អាខោន ឆាតទៅជេរ។
សារនោះ លោក អ៊ិន សុភិន រៀបរាប់ថា៖ «អត់យល់ រឿងថ្មីរហូតខ្ញុំអើយ គ្រាន់តែបេក្ខនារីខេត្តបាត់ដំបង ក្លាយជាអ្នកឈ្នះមកុដ Miss Global Cambodia 2024 មានអ្នកឆាតមកជេរខ្ញុំចង់ 300 Facebook Account ថាយកតែខ្សែក្មួយខ្លួនឯង»៕
