ខុន ស្រីខួច Miss Global Cambodia 2024 ដឹងគុណដល់លោក អ៊ិន សុភិន ជាពូបង្កើត ដែលជួយជ្រោមជ្រែងតាំងពីថ្ងៃដាក់ពាក្យប្រកួត
មហាជននិយមតាមដានការប្រកួតវិស័យបវរកញ្ញា ច្បាស់ជាបានជ្រាបហើយថា កាលពីរាត្រីថ្ងៃទី ២០ ខែវិច្ឆិកា ឆ្នាំ ២០២៤ កន្លងទៅនេះ កម្ពុជាបានរកឃើញម្ចាស់មកុដ Miss Global Cambodia 2024 ហើយ ដោយបានទៅលើ កញ្ញា ខុន ស្រីខួច ជាបេក្ខនារី Miss Global តំណាងឱ្យខេត្តបាត់ដំបង។
ក្នុងនោះ អ្វីដែលគួរឱ្យចាប់អារម្មណ៍ បន្ទាប់ពីកម្មវិធីប្រកួតសម្រស់មួយនេះ ប្រកាសនូវរាជិនីគ្រងមកុដថ្មីដែលបានទៅលើបវរកញ្ញា ខុន ស្រីខួច ក្នុងនោះគេក៏បានឃើញ លោក អ៊ិន សុភិន បានចេញមុខផុសសារអបអរសាទរដល់នាង ហើយលោកថែមទាំងបានបញ្ជាក់ថា Miss Global Cambodia 2024 រូបនេះ គឺត្រូវជាក្មួយស្រីបង្កើតរបស់លោកថែមទៀតផង។
ដោយឡែក ក្រឡេកមកកាន់ម្ចាស់មកុដ Miss Global Cambodia 2024 កញ្ញា ខុន ស្រីខួច ឯណោះវិញ ក្រោយបានគ្រងមកុដហើយនោះ នាងក៏បានចេញមកបង្ហោះសារអរគុណទៅដល់អ្នកជុំវិញខ្លួន ដែលតែងតែផ្តល់កម្លាំងចិត្ត និង ជួយជ្រោមជ្រែងគ្រប់យ៉ាង។
លើសពីនោះ អ្វីដែលធ្វើឱ្យមហាជនកាន់តែចាប់អារម្មណ៍ទៀតនោះ គឺកញ្ញា ខុន ស្រីខួច បានអរគុណដល់លោក អ៊ិន សុភិន ដែលជាពូដ៏ល្អបានជួយនាងតាំងពីអំឡុងពេលដាក់ពាក្យរហូតដល់ថ្ងៃគ្រងមកុដ ដោយឃ្លានោះ Miss Global Cambodia 2024 បានរៀបរាប់ថា៖ «…ក៏សូមអរគុណ លោកពូខ្ញុំ Sophin In ដែលបានក្លាយជាលោកពូដ៏ល្អក្នុងអំឡុងពេលដាក់ពាក្យរហូតមកដល់ពេលគ្រងមកុដ»៕
