បញ្ចប់ Solo Concert នៅបាត់ដំបង ឱក សុគន្ធកញ្ញា រំឭកអនុស្សាវរីយ៍ចាំមិនភ្លេចមួយ កាលអំឡុងឆ្នាំ ២០០០

ក្រោយពីទទួលបានភាពជោគជ័យយ៉ាងធំសម្បើមក្នុងការប្រគំតន្ត្រីទោល «THE Q – RISE OF THE QUEEN» កាលពីអំឡុងខែកញ្ញា ឆ្នាំ ២០២៤ ក្នុងទីក្រុងភ្នំពេញហើយនោះ កំពូលតារាចម្រៀង ឱក សុគន្ធកញ្ញា ក៏បាន និង កំពុងបន្តដំណើរការប្រគំតន្ត្រីទោលនៅតាមបណ្តាខេត្តនានាផងដែរ។

ក្នុងនោះ អ្នកនាង ឱក សុគន្ធកញ្ញា បានជ្រើសរើសខេត្តបាត់ដំបង ជាខេត្តដំបូង ដែលអ្នកនាងបានរៀបចំការប្រគំតន្ត្រីទោលយ៉ាងកក្រើកមិនចាញ់ទីក្រុងភ្នំពេញនោះឡើយ កាលពីថ្ងៃទី ៣០ ខែវិច្ឆកា ឆ្នាំ ២០២៤ កន្លងទៅ។

យ៉ាងណាមិញ ក្រោយពីការប្រគំតន្ត្រីទោលនៅឯខេត្តបាត់ដំបងបានបញ្ចប់ទៅយ៉ាងជោគជ័យប៉ុន្មានថ្ងៃ ស្រាប់តែថ្មីៗនេះមានការចែករំលែកនូវអតីតឆាកប្រគំតន្ត្រីមួយនៅក្នុងបរិវេណវិទ្យុជាតិ និង ទូរទស្សន៍ខេត្តបាត់ដំបង ដែលជាឆាកអ្នកនាង ឱក សុគន្ធកញ្ញា ធ្លាប់បានសម្តែងដែរកាលពីអំឡុងឆ្នាំ ២០០០។

ភ្លាមនោះ ក្រោយពីឃើញវីដេអូនោះហើយ អ្នកនាង ឱក សុគន្ធកញ្ញា ក៏បានរំឭកពីអតីតកាលរបស់អ្នកនាង ថាឆាកនោះ គឺជាឆាកដំបូង ដែលអ្នកនាងធ្លាប់បានបង្ហើរសំនៀងដោយចៃដន្យនៅក្នុងខេត្តបាត់ដំបង។

អ្នកនាង ឱក សុគន្ធកញ្ញា បានរៀបរាប់ថា៖ «ឆាកដំបូងដែល នាងខ្ញុំឡើងបង្ហើរសំនៀងដោយចៃដន្យ ដែលមានអ្នកឈរស្តាប់។ ជាច្រើនឆ្នាំបានកន្លងទៅ នាងខ្ញុំក៏មាន ការប្រគំតន្ត្រីផ្ទាល់ខ្លួននៅក្នុងទឹកដីខេត្តបាត់ដំបង។ បោះជំហានមួយៗតែមិនបោះបង់»៕