ធ្មេចបើកៗ ៣ ខែទៀត ខាយ និង គូដណ្តឹង ចូលរោងការក្លាយជាស្វាមីភរិយាហើយ ពេលនេះសូម្បីរូបថតមុខរោងក៏ថតរួចរាល់

មកដល់ពេលនេះ រយៈពេលជាង ១ ឆ្នាំ ហើយ ដែលតារាប្រុសសំឡេងផ្អែមលោក ខាយ និង កញ្ញា មុន្នីនាថ បានបញ្ចប់ឈ្មោះជាសង្សារក្លាយជាគូដណ្ដឹង កាលពីថ្ងៃទី ២៧ ខែកញ្ញា ឆ្នាំ ២០២៣ កន្លងទៅ។

ក្នុងនោះ ចាប់តាំងពីប្ដូរឈ្មោះជាសង្សារក្លាយជាគូដណ្ដឹងនឹងគ្នាមក ខាយ និង កញ្ញា មុន្នីនាថ កាន់តែបង្ហាញសេចក្ដីទុកចិត្តលើគ្នា យល់ចិត្ត គិតគូររឿងអនាគតជាមួយគ្នា ជាពិសេសជារឿយៗ គេតែងឃើញអនាគតគូស្វាមីភរិយាដ៏ស័ក្ដិសមមួយគូនេះ បណ្ដើរគ្នាទៅណាមកណាប្រកបដោយស្នាមញញឹម និង ក្ដីស្រឡាញ់ចំពោះគ្នា ធ្វើឱ្យអ្នកជុំវិញខ្លួនលួចច្រណែននឹងគូនេះមិនតិចនោះទេ។ ម្យ៉ាងវិញទៀត ក្រោយពីភ្ជាប់ពាក្យនឹងគ្នាហើយនោះ អ្នកគាំទ្រក៏អន្ទះសាចង់ឃើញ គូដណ្តឹងមួយគូនេះ ដឹកដៃគ្នាចូលរោងការឆាប់ៗផងដែរ។

កន្លងទៅនេះ លោក ខាយ និង គូដណ្តឹង ក៏បានឱ្យដឹងដែរថា អ្នកទាំងពីរគិតគូររកពេលាល្អដើម្បីរៀបចំពិធីមង្គលការតាមប្រពៃណីហើយ ដោយរៀបចំនៅដើមឆ្នាំ ២០២៥ ខាងមុខ នៅគេហដ្ឋានខាងស្រីខេត្តសៀមរាប ចំណែកពេលវេលាច្បាស់លាស់ ពួកគេទាំងពីរសុំលាក់សិន។

យ៉ាងណាមិញ ថ្មីៗនេះ លោក ខាយ និង គូដណ្តឹងបានដឹកដៃគ្នាថតរូប Pre-Wedding ទាំងក្នុង និង ក្រៅស្ទូឌីយ៉ោ មានទាំងបុរាណ និង សម័យ កាន់តែធ្វើឱ្យអ្នកគាំទ្រលើកឡើងថា មង្គលការរបស់ប្រុសសង្ហា ស្រីស្អាតមួយគូនេះ កាន់តែកៀកមកដល់ជាក់ជាមិនខាន។

ជាក់ស្តែង ដូចលោក ខាយ ធ្លាប់ជម្រាបប្រាប់ថា មង្គលការលោក និង គូដណ្តឹងនឹងរៀបចំឡើងនៅដើមឆ្នាំ ២០២៥ ប៉ុន្តែលោកមិនទាន់បញ្ជាក់ថ្ងៃច្បាស់លាស់ តែយ៉ាងណា ក្រឡេកទៅមើលម្តាយមីង កញ្ញា មុន្នីនាថ ដែលត្រូវជាមីងប្រសារបស់លោក ខាយ វិញ បានឱ្យបង្ហើបពីមង្គលការរបស់អ្នកទាំង ២ នឹងរៀបចំនៅដើមខែមីនា ឆ្នាំ ២០២៥ ខាងមុខនេះ៕