មិត្តភក្ដិមានគូចោលអស់! ថ្ងៃភ្ជាប់ពាក្យ រឿន ណាត MUC ៤ ជំនាន់ជួបគ្នា ៣ នាក់បង្ហាញចិញ្ចៀនគូអត់តែ សំណាង អេលីណា
កាលពីថ្ងៃទី ២០ ខែធ្នូ ឆ្នាំ ២០២៤ កន្លងទៅ អ្នកគាំទ្រ និង មិត្តទាំងក្នុង ក្រៅសិល្បៈជាច្រើនបានចូលរួមអបអរសាទរក្នុងថ្ងៃភ្ជាប់ពាក្យដល់ Miss Universe Cambodia 2018 កញ្ញា រឿន ណាត និង លោក លាង វេងហ៊ួរ Mister Friendship International 2023 ជាបន្តបន្ទាប់។
ក្នុងនោះដែរ ក្រឡេកទៅមើលកម្មវិធី ដែលរៀបចំឡើងនៅសណ្ឋាគារលំដាប់ផ្កាយ ៥ ឯណោះវិញ ក៏មានការអញ្ជើញចូលរួមពីសំណាក់ភ្ញៀវកិត្តិយសជាច្រើន ដោយសុទ្ធសឹងតែជាក្រុមគ្រួសារ និង មិត្តភក្តិស្និទ្ធស្នាលរបស់អនាគតគូស្វាមីភរិយាថ្មីទាំង ២ រូប ខាងលើ។
ដោយឡែកអ្វីដែលកំពុងត្រូវបានអ្នកគាំទ្រចាប់អារម្មណ៍នោះ គឺរូបភាពរបស់ MUC ៤ ជំនាន់ជួបជុំគ្នា ពោលគឺ MUC 2018 កញ្ញា រឿន ណាត, MUC 2019 កញ្ញា សំណាង អេលីណា, MUC 2020 អ្នកនាង ងិន ម៉ារ៉ាឌី និង MUC 2021 កញ្ញា រ៉េត សារីតា។
ជាក់ស្តែង អ្វីដែលហាក់ធ្វើឱ្យអ្នកគាំទ្រអស់សំណើចបន្តិច គឺរូបភាព ២ សន្លឹករបស់ស្រីស្អាតទាំង ៤ រូប រួមមាន កញ្ញា រឿន ណាត, អ្នកនាង ងិន ម៉ារ៉ាឌី និង កញ្ញា រ៉េត សារីតា បានបង្ហាញពីចិញ្ចៀនភ្ជាប់ពាក្យ និង ចិញ្ចៀនរៀបការ នៅឡើយតែកញ្ញា សំណាង អេលីណា នៅមិនទាន់មានបង្ហាញនឹងគេ។ លើសពីនោះ រូបភាពនោះអ្នកគាំទ្រក៏បាននាំគ្នាចំអន់លេងដល់ កញ្ញា សំណាង អេលីណា ថា ពេលណាទើបបង្ហាញពីម្ចាស់បេះដូងនឹងគេ៕
