![អង្គការសហប្រជាជាតិព្យាករណ៍ ឥណ្ឌាអាចកើនចំនួនប្រជាជនលើសប្រទេសចិនទ្វេដង នៅឆ្នាំ ២០៨៥](https://www.popular.com.kh/wp-content/uploads/2024/07/feature-52.jpg)
អង្គការសហប្រជាជាតិព្យាករណ៍ ឥណ្ឌាអាចកើនចំនួនប្រជាជនលើសប្រទេសចិនទ្វេដង នៅឆ្នាំ ២០៨៥
អង្គការសហប្រជាជាតិ បានព្យាករណ៍ថា ចំនួនប្រជាជនក្នុងប្រទេសឥណ្ឌា នឹងកើនដល់ ១.៦១ ពាន់លាននាក់ ក្នុងឆ្នាំ ២០៨៥ ខណៈចំនួនប្រជាជនក្នុងប្រទេសចិន អាចធ្លាក់មកនៅត្រឹម ៨០៦ លាននាក់។
![](https://www.popular.com.kh/wp-content/uploads/2024/07/1-3.jpeg)
កាលពីថ្ងៃទី ១១ ខែកក្កដា ឆ្នាំ ២០២៤ កន្លងទៅ អង្គការសហប្រជាជាតិបានចេញរបាយការណ៍ World Population Prospects (WPP) ដោយលើកឡើងថា គម្លាតចំនួនប្រជាជនរវាងប្រទេសចិន និងឥណ្ឌា នឹងឃ្លាតគ្នាខ្លាំងក្នុងរយៈពេលប៉ុន្មានឆ្នាំទៅមុខទៀត។ ចំនួនប្រជាជនឥណ្ឌា ក្នុងឆ្នាំ ២០៨៥ រំពឹងថានឹងឡើងដល់ ១.៦១ ពាន់លាននាក់ លើសពីរដងនៃចំនួនប្រជាជនក្នុងប្រទេសចិន។ ដល់ឆ្នាំ ២១០០ គម្លាតចំនួនប្រជាជនប្រទេស ២ នេះ នឹងឡើងលើសគ្នាជិត ៣ ដង ដោយប្រជាជនឥណ្ឌា ធ្លាក់មកវិញត្រឹម ១.៥ ពាន់លាននាក់ ខណៈចិន នៅសល់ប្រជាជនត្រឹម ៦៣៣ លាននាក់។
![](https://www.popular.com.kh/wp-content/uploads/2024/07/3-2.jpeg)
របាយការណ៍ WPP ដែលអង្គការសហប្រជាជាតិធ្វើឡើងរាល់ ២ ឆ្នាំម្ដង បានបង្ហាញដែរថា ប្រជាជនឥណ្ឌាក្នុងពេលបច្ចុប្បន្នមានចំនួន ១.៤៥១ ពាន់លាននាក់ ដែលចំនួននេះ គឺលើសការព្យាករណ៍ទុកកាលពី ២ ឆ្នាំមុនដល់ទៅ ៩ លាននាក់។ ចំណែកប្រទេសចិនវិញ បច្ចុប្បន្នមានប្រជាជនសរុបចំនួនជាង ១.៤២ ពាន់លាននាក់។
![](https://www.popular.com.kh/wp-content/uploads/2024/07/2-3.jpeg)
តាមរបាយការណ៍ពីអង្គការសហប្រជាជាតិនេះ បានបន្ថែមទៀតថា ក្នុងឆ្នាំ ២១០០ បន្ទាប់ពីឥណ្ឌា និង ចិន ចំណាត់ថ្នាក់បន្ទាប់គឺមានដូចជា ប្រទេសប៉ាគីស្ថាន មានពលរដ្ឋសរុប ៥១១ លាននាក់ នីហ្សេរីយ៉ា មាន ៤៧៧ លាននាក់ កុងហ្គោ មានចំនួន ៤៣១ លាននាក់ និងសហរដ្ឋអាមេរិក មានចំនួន ៤២១ លាននាក់៕
ប្រភព៖ VN Express