តារាកំប្លែងកូរ៉េ Seo Se Won ទទួលមរណភាពក្នុងវ័យ ៦៧ ឆ្នាំ នៅប្រទេសកម្ពុជា
តាមរបាយការណ៍ព័ត៌មានបានឱ្យដឹងថា តារាកំប្លែង Seo Se Won ដែលបច្ចុប្បន្នកំពុងស្នាក់នៅប្រទេសកម្ពុជា បានទទួលមរណភាពភ្លាមៗ ក្រោយទទួលការព្យួរសេរ៉ូមពីមន្ទីរពេទ្យកូរ៉េមួយនៅកម្ពុជា។
បើតាមសមាគមកូរ៉េកម្ពុជា បានឱ្យដឹងថា តារាកំប្លែង Seo Se Won បានគាំងបេះដូងភ្លាមៗ ខណៈកំពុងព្យួរសេរ៉ូមនៅឯមន្ទីរពេទ្យកូរ៉េមួយកន្លែងក្នុងក្រុងភ្នំពេញ។ ក្រុមគ្រូពេទ្យបានព្យាយាមជួយសង្គ្រោះលោកផងដែរ ប៉ុន្តែនៅតែមិនអាចសង្គ្រោះបាន។
គួរឱ្យដឹងថា លោក Seo Se Won គឺជាតារាកំប្លែងដ៏មានប្រជាប្រិយភាពមួយរូប ដែលចូលប្រឡូកវិថីសិល្បៈដំបូងក្នុងឆ្នាំ ១៩៧៩។ លោក ត្រូវបានគេស្គាល់ខ្លាំង នៅពេលចូលរួមក្នុងកម្មវិធី Sunday Night ឬ Seo Se Won Show ជាដើម។ ក្រោយលែងលះគ្នាជាមួយប្រពន្ធមុនជាតារាសម្ដែងស្រីរូបស្រស់ Seo Jung Hee លោកក៏បានរៀបការម្ដងទៀត និង ផ្លាស់មកនៅប្រទេសកម្ពុជាជាមួយប្រពន្ធក្រោយតាំងពីឆ្នាំ ២០១៦ មកទល់បច្ចុប្បន្ន៕
ប្រភព៖ Kpop Reporter
