![ខូឡិកហ្សិន Couture នេះកំពុងផ្ទុះខ្លាំងនៅប៉ារីស តាមពិតជាថ្វីដៃរបស់កំលោះសង្ហាជនជាតិចិន CHENEY CHAN](https://www.popular.com.kh/wp-content/uploads/2024/07/Master-for-Web-40.jpg)
ខូឡិកហ្សិន Couture នេះកំពុងផ្ទុះខ្លាំងនៅប៉ារីស តាមពិតជាថ្វីដៃរបស់កំលោះសង្ហាជនជាតិចិន CHENEY CHAN
Haute Couture គឺជាហ្វេហ្សិនលំដាប់ខ្ពស់ ជាសម្លៀកបំពាក់ប្រណីតដែលសម្រិតសម្រាំងយកគុណភាពលើគុណភាព រីឯម៉ូដត្រូវបានធ្វើឡើងដោយអ្នកឯកទេសខ្ពស់ មានភាព Unique ចំណែកតម្លៃវិញក៏មិនធម្មតាផងដែរ។ ខណៈបច្ចុប្បន្ន រដូវកាលបញ្ចេញខូឡិកហ្សិន Haute Couture បានមកដល់ ក្នុងនោះគេបានចាប់អារម្មណ៍ខ្លាំងទៅលើខូឡិកហ្សិនរបស់ម៉ាកយីហោមួយឈ្មោះថា CHENEY CHAN។ ជាក់ស្តែង ខូឡិកហ្សិនពីម៉ាកនេះ គ្រប់ឈុតទាំងអស់មើលមកពិតជាប្លែកភ្នែក ជាម៉ូដហ្វេហ្សិនលំដាប់ខ្ពស់ មានលក្ខណៈប្រណីតខ្លាំង និង លាយឡំសិល្បៈគួរជាទីចាប់ចិត្តបំផុត។
![](https://www.popular.com.kh/wp-content/uploads/2024/07/da3c47d1-05e0-47a8-aa71-eebfc060a2f1-scaled.jpg)
![](https://www.popular.com.kh/wp-content/uploads/2024/07/08d7bc95-dcd5-4920-8bb0-a117458a4780-scaled.jpg)
![](https://www.popular.com.kh/wp-content/uploads/2024/07/5392b198-be7a-417e-8e3a-90daac1445cf-scaled.jpg)
តាមការស្រាវជ្រាវរបស់ «ប្រជាប្រិយ» ម្ចាស់ប្រ៊េនសម្លៀកបំពាក់នេះបានប្រើឈ្មោះ CHENEY CHAN ដែលជាឈ្មោះរបស់ខ្លួនធ្វើជាម៉ាកយីហោតែម្តង។ លោក CHENEY CHAN ជាអ្នកច្នៃម៉ូដជនជាតិចិន រស់នៅទីក្រុងប៉េកាំង ប្រទេសចិន។ លោកបានបង្កើតប្រ៊េននេះនៅក្នុងឆ្នាំ ២០១២។ អត្តសញ្ញាណនៃការច្នៃម៉ូដប្រចាំប្រ៊េនរបស់លោក គឺការផ្តោតទៅលើ «បំណែកនៃភាពអេឡេហ្គង់» ដែលជាការលាយបញ្ចូលគ្នាបែបសហសម័យ រវាងរចនាសម្ព័ន្ធស្ថាបត្យកម្ម និង ធាតុក្លាសិករបស់ចិន ដើម្បីបង្ហាញពីរាងរៅដ៏ស្រស់ស្អាតរបស់ស្ត្រី។ ខណៈផ្តោតលើសិល្បៈហត្ថកម្មប្រពៃណី ម៉ាករបស់លោកក៏បានដាក់បញ្ចូលនូវទម្រង់សិល្បៈសហសម័យថ្មីៗ ដើម្បីបង្កើតភាពល្អឯកដែលជាស្នូលដ៏សំខាន់របស់ម៉ាកយីហោផងដែរ។
![](https://www.popular.com.kh/wp-content/uploads/2024/07/1706859123580634.jpg)
ចំពោះការចាប់ផ្តើមជាមួយសម្លៀកបំពាក់ Haute Couture កាលពីឆ្នាំ ២០២១ លោក CHENEY CHAN បានបង្កើតការបង្ហាញសម្លៀកបំពាក់ Couture មួយមានឈ្មោះថា Jinghong Zhaoying ឬប្រែមកថា ស្រមោលសម្រស់ដ៏អស្ចារ្យ។ កម្មវិធីនេះបង្កើតឡើងដើម្បីជាឱកាសបង្ហាញពីការអភិវឌ្ឍន៍ម៉ាកយីហោទៅក្នុង Oriental Fashion House ឬ ផ្តោតការច្នៃម៉ូដដកស្រង់ពីប្រពៃណី វប្បធម៌ និង សិល្បៈដែលបន្សល់ជាយូរលង់។ គ្រានោះ លោកបង្កើតឈុតខូឡិកហ្សិនដកស្រង់ចេញពីស្រមោលដើមឫស្សី និង ភាពឆើតឆាយនៃព័រសឺឡែន។ ក្រោយចំណាយពេលរាប់រយម៉ោងទៅលើឈុតខូឡិកហ្សិន ទីបំផុតលោកទទួលបានផ្លែផ្កាសម្លៀកបំពាក់ Couture ដែលមានការចាប់អារម្មណ៍លើសពីការរំពឹងទុក។
![](https://www.popular.com.kh/wp-content/uploads/2024/07/1706859123582553.jpg)
![](https://www.popular.com.kh/wp-content/uploads/2024/07/Famous-actress-Zhong-Chuxi-dressed-in-CHENEY-CHAN-Private-No.020-couture-for-a-magazine-cover..jpg)
នៅឆ្នាំ ២០២៣ អ្នកច្នៃម៉ូដជាម្ចាស់ម៉ាកយីហោ CHENEY CHAN បានបោះជំហានឡើងទៅមួយកម្រិតទៀត ដោយចាប់ផ្តើមជាមួយកម្មវិធីហ្វេហ្សិនលំដាប់ខ្ពស់។ លោកបានបង្កើតខូឡិកហ្សិន ដោយបញ្ចូលសិល្បៈហត្ថកម្មប្រពៃណីដូចជា ប្រពៃណីឌិនអង្កាំ ប្រពៃណីប៉ាក់ហាងចូវ ក្បាច់ប៉ាក់ក្នុងរាជវាំង សិល្បៈធ្វើផ្កា និង សិល្បៈហត្ថកម្មជាច្រើន ដែលផ្នែកនីមួយៗត្រូវបានប្រើពេល និង ការផ្ចិតផ្ចង់យ៉ាងខ្លាំង រហូតបញ្ចេញបានសម្លៀកបំពាក់ដែលមានលក្ខណៈក្លាសិកបំផុត។
ជាជោគជ័យបង្ហាញជាក់ស្តែង នៅឆ្នាំ ២០២៤ នេះ លោក CHENEY CHAN បានបញ្ចេញ ខូឡិកហ្សិន Couture F/W 24/25 សម្រាប់រដូវត្រជាក់នៅក្នុងកម្មវិធី Paris Fashion Week នៅឯទីក្រុងប៉ារីស ប្រទេសបារាំង។ ខូឡិកហ្សិននេះមានឈ្មោះថា «Dream in Bloom» ដែលបង្ហាញពីសម្រស់នៃផ្ការីក និង មេអំបៅ។ គ្រប់ឈុតទាំងអស់សុទ្ធសឹងប្លែកភ្នែក ម៉ូដធំៗ និង មានភាពប្រណីតឥតខ្ចោះ។ ជាមួយខូឡិកហ្សិននេះ អន្តរជាតិបានងាកមកចាប់អារម្មណ៍យ៉ាងខ្លាំងទៅលើស្នាដៃ ក៏ដូចជាយីហោរបស់លោក។ ជាពិសេសឈុតរបស់លោក បានទាក់ទាញចង្កោមអ្នកហ្វេហ្សិននិយមជាន់ខ្ពស់ តារាល្បីៗ និង ក្រុមហ៊ុនហ្វេហ្សិនល្បីៗលំដាប់ពិភពលោកផងដែរ៕
![](https://www.popular.com.kh/wp-content/uploads/2024/07/fb85.jpg)
![](https://www.popular.com.kh/wp-content/uploads/2024/07/5dc5.jpg)
![](https://www.popular.com.kh/wp-content/uploads/2024/07/0715.jpg)
![](https://www.popular.com.kh/wp-content/uploads/2024/07/9d2e.jpg)
![](https://www.popular.com.kh/wp-content/uploads/2024/07/5d41.jpg)
![](https://www.popular.com.kh/wp-content/uploads/2024/07/9840.jpg)
![](https://www.popular.com.kh/wp-content/uploads/2024/07/8503.jpg)