មុនគេហើយ! វត្តសន្សំកុសលរៀបចំតុបតែងលម្អវត្ត ចងទង់ជាតិ ទង់សាសនា ធ្វើគោមផ្កាយពីក្រមាធំៗតាំងត្រៀមសម្រាប់បុណ្យចូលឆ្នាំថ្មី

តាមរយៈការបង្ហោះនៅលើគណនីផេកផ្លូវការរបស់វត្តសន្សំកុសល កាលពីថ្ងៃទី ២៤ ខែមីនា ឆ្នាំ ២០២៤ កន្លងទៅ ព្រះសង្ឃជាច្រើនអង្គបាន និង កំពុងត្រៀមរៀបចំ ក៏ដូចជាតុបតែងលម្អក្នុងវត្ត សម្រាប់ពិធីបុណ្យចូលឆ្នាំថ្មីនាពេលខាងមុខ។

ដោយឡែក បើយើងក្រឡែកមកមើលពីសកម្មភាពរបស់ព្រះសង្ឃជាច្រើនអង្គ ដែលបានតុបតែងលម្អមានទាំងខ្វោងទ្វារវត្ត ព្រមទាំងធ្វើគោមចេញពីក្រមាយ៉ាងស្រស់ស្អាតជាដើម និង សកម្មភាពផ្សេងៗទៀតផងដែរ។

គួរឱ្យដឹងដែរថា ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ នឹងឈានចូលមកដល់នៅថ្ងៃសៅរ៍​ ៥ កើត ខែចេត្រ ត្រូវនឹងថ្ងៃទី ១៣ ខែមេសា គ្រិស្តសករាជ ២០២៤ វេលាម៉ោង ២២ និង ២៤ នាទីយប់។ សម្រាប់ឆ្នាំរោង ឆ្នាំថ្មីនេះ ទេវតាដែលនឹងយាងមកគ្រប់គ្រងជម្ពូរទ្វីបមនុស្សលោកគឺជាមគ្គនាយិកាព្រះនាម មហោទរាទេវី ជារាជបុត្រីទី ៧ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌ខៀវ លម្អនៅព្រះកាណ៌ដោយសៀតផ្កាត្រកៀត អភរណៈនិលរតន៍ ភក្សាហារទ្រង់សាច់ទ្រាយ ព្រះហស្តស្ដាំទ្រង់កងចក្រ ព្រះហស្តឆ្វេងទ្រង់ត្រីសូល៍ ទ្រង់គង់ផ្ទំបើកព្រះនេត្រនៅលើខ្នងស្ដេចមយូរា (ក្ងោក) ជាយានពាហនៈ៕