ស្អាតដូចគំនូរ! នៅកោះពោធិ៍ ខេត្តកែប យប់ឡើងមានផ្លុងតុង មើលឃើញច្បាស់ៗផ្ទាល់ភ្នែក

ស្ថិតនៅចម្ងាយប្រមាណ ១៦០ គីឡូម៉ែត្រ ពីរាជធានីភ្នំពេញ ថ្វីដ្បិតតែមានភូមិសាស្ត្រតូចពិតមែន តែខេត្តកែបគឺជាតំបន់ដែលមានសក្ដានុពលទេសចរណ៍ខ្លាំងក្លាមិនចាញ់ខេត្តដទៃនោះឡើយ ដោយមានទាំងតំបន់ទេសចរណ៍មាត់ឆ្នេរ តំបន់ទេសចរណ៍ធម្មជាតិ ផ្សារក្ដាមដ៏ធំ និង កន្លែងកម្សាន្តជាច្រើន ទាក់ចិត្តភ្ញៀវទេសចរណ៍ឱ្យចង់ទៅទស្សនាកម្សាន្តមិនចេះជិនណាយ។

ថ្មីៗនេះផងដែរ មហាជនអ្នកប្រើប្រាស់បណ្ដាញសង្គម នាំគ្នាផ្ទុះការចាប់អារម្មណ៍ជាខ្លាំង បន្ទាប់ពីបានឃើញផេកអ្នកទេសចរ ដៃគូ Explore បានបង្ហោះរូបភាពជាច្រៀនអំពីផ្លុងតុង ដែលកើតមាននៅឯកោះពោធិ៍ ខេត្តកែប ជាកោះដែលមានឆ្នេរ​ និង​ ទេសភាពស្រស់ស្អាត ទឹកសមុទ្រថ្លាដូចកញ្ចក់។

តាមរយៈប្រភពខាងលើបានបង្ហាញពីទិដ្ឋភាពថតជាប់ផ្លុងតុងយ៉ាងស្រស់ស្អាតដូចគំនូរ ព្រមទាំងបានបញ្ជាក់ឱ្យដឹងថា សឹងមិនគួរឱ្យជឿ ដែលយប់នោះ ពួកគាត់បានឃើញផ្លុងតុងលើកទី ១ ច្បាស់ៗដូចនេះ នៅកោះពោធិ៍​ ខេត្តកែប​។

តាមរយៈប្រភពខាងលើ បានឱ្យដឹងថា កោះពោធិ៍ ជាកោះមួយដែលមានឆ្នេរ​ និង​​ទេសភាពស្រស់ស្អាត​ រីឯទឹកសមុទ្រវិញថ្លាដូចកញ្ចក់ដែលប្រិយមិត្តអាច​ស្ទូចត្រី​ រកក្ដាម​ និង មើលផ្កាថ្ម​ តែកោះនេះមិនសូវមានអ្នកស្គាល់​ ឬទៅលេងទេ​ ខណៈទីនោះប្រិយមិត្តអាចបោះតង់បានដោយសុវត្ថិភាព​ មានទឹកសាប​ងូត​ និង​ បន្ទប់ទឹក​ ហើយមានប្រជាជនច្រើនគួរសម ដែលរស់នៅលើកោះនេះ​ ហើយនៅលើកោះក៏មានម្ហូបកម្មង់​ គុយទាវ​ និង​ កាហ្វេពេលព្រឹករសជាតិបែបអ្នកភូមិផងដែរ​៕

ប្រភព ៖ ដៃគូ Explore