រំលង ១២ ឆ្នាំ តួប្តី ៥ រូប ប្តូរកាយជាប្រពន្ធ ក្នុងរឿង «ប្តីល្អ» មានស្ថានភាពជីវិតបែបនេះនៅបច្ចុប្បន្ន

បើរំឭកកាលពីអំឡុងឆ្នាំ ២០១០ ច្បាស់ណាស់មហាជនអ្នកនិយមទស្សនាភាពយន្តប្រាកដជានៅចងចាំនៅឡើយរឿង «ប្តីល្អ» ដែលនិពន្ធ និង ដឹកនាំសម្តែងដោយ លោកស្រី ពាន់ ភួងបុប្ផា ដោយបានឆ្លុះបញ្ចាំងពីរឿងរ៉ាវរបស់គូស្វាមីភរិយាក្នុងសង្គមតែងរមែងលើកឡើងថា «ស្ត្រីវិលចង្ក្រានមិនជុំ»។ យ៉ាងណាក្នុងរឿង «ប្តីល្អ» នោះដែរ បានសបញ្ជាក់ពីស្ត្រីវិលចង្ក្រានមិនជុំ ប៉ុន្តែត្រូវធ្វើការងារសព្វគ្រប់បែបយ៉ាងនៅក្នុងផ្ទះសម្បែងទៅវិញ។

រឿងភាគបែបកំប្លែង មនោសញ្ចេតនានេះដែរ ច្បាស់ណាស់លោកអ្នកប្រាកដជាចងចាំមិនភ្លេចនូវតួអង្គសំខាន់ៗចំនួន ៩ រូប ដូចជា លោក ម៉ម រស្មី លោក អ៊ឹង រដ្ឋា ហៅ ទុយ លោក អេនឌី លោក ខៀវ សំភេទ លោក យូ ឌីស្កូ អ្នកនាង ស៊ឹម សុលីកា អ្នកនាង កែវ ពេជ្រពិសី អ្នកនាង នឿន ចាន់ធឿន និង អ្នកនាង ឱក សុគន្ធកញ្ញា ជាដើម។

រឿងនេះដែរ ក៏បានធ្វើឱ្យអ្នកទស្សនាមិនតិចនោះទេផ្លាស់ប្តូរសំណើចផង យំផងទៅតាមតួអង្គ ដែលគេចាំច្បាស់ថា តួប្រុសស្រីទាំង ៩ រូប បានផ្លាស់ប្តូរភេទគ្នាតាមរយៈសុបិន ដោយស្រីក្លាយទៅជាប្រុស ប្រុសក្លាយទៅជាស្រី។ ក្នុងនោះ តួប្រុសទាំង ៥ ខាងលើ ក៏បានសម្តែងជាតួអង្គស្រី ពោលគឺភរិយាហាក់ត្រូវបានអ្នកគាំទ្រសរសើរ និង ចងចាំមិនភ្លេចនូវទេពកោសល្យរបស់ពួកគេឡើយ។

១. លោក ម៉ម រស្មី

លោក ម៉ម រស្មី ត្រូវបានដើរតួអង្គជាឪពុក និង ផ្លាស់ទៅជាតួម្តាយ ដែលជាចាស់ទុំជាងគេក្នុងសាច់រឿង «ប្តីល្អ»។ បច្ចុប្បន្ន អតីតតារាសម្តែងល្បីឈ្មោះរូបនេះ បានផ្អាកលើវិថីសិល្បៈទាំងស្រុងហើយ។

២. លោក អ៊ឹង រដ្ឋា ហៅ ទុយ

លោក អ៊ឹង រដ្ឋា ត្រូវបានសម្តែងដើរតួជាស្វាមីរបស់អ្នកនាង ស៊ឹម សូលីកា ក្រោយមកក៏បានផ្លាស់ប្តូរទៅជាភរិយាវិញ។ តួអង្គស្រីសម្តែងដោយលោក អ៊ឹង រដ្ឋា ហាក់កម្សត់ខ្លាំងជាងគេក្នុងសាច់រឿងខាងលើនេះ។ យ៉ាងណា ងាកមកបច្ចុប្បន្នភាព លោក អ៊ឹង រដ្ឋា នៅតែបន្តលើវិថីសិល្បៈដូចដើម ដែលជាពិធីករផង និង តារាសម្តែងផង។

៣. លោក ខៀវ សំភេទ

លោក ខៀវ សំភេទ ត្រូវបានសម្តែងដើរតួជាស្វាមីរបស់អ្នកនាង កែវ ពេជ្រពិសី ក៏មិនខុសពីតួលោក ទុយ ប៉ុន្មានដែរ ក៏ត្រូវបានប្តូរសម្តែងជាភរិយាវិញ។ បច្ចុប្បន្នលោក ខៀវ សំភេទ កំពុងតែសាងគ្រួសាររស់នៅឯសហរដ្ឋអាមេរិក។

៤. លោក យូ ឌីស្កូ

លោក យូ ឌីស្កូ ត្រូវបានសម្តែងដើរតួជាស្វាមីរបស់អ្នកនាង នឿន ចាន់ធឿន និង ប្តូរទៅជាភរិយារបស់អ្នកនាង នឿន ចាន់ធឿន ដូចគ្នា។ សព្វថ្ងៃនេះ បន្ទាប់ពីជាសះស្បើយពីជំងឺអាក្រក់ (ខូចក្រលៀន) លោក យូ ឌីស្កូ ក៏នៅតែបន្តលើអាជីពសិល្បៈជាតារាចម្រៀង និង តារាសម្តែងដូចដើម។

៥. លោក អេនឌី

លោក អេនឌី ត្រូវបានសម្តែងប៉ះជាស្វាមីនឹងកំពូលតារាចម្រៀង ឱក សុគន្ធកញ្ញា ក៏ត្រូវបានអ្នកគាំទ្រសរសើរមិនតិចដែរកាលនោះ។ បច្ចុប្បន្ន លោក អេនឌី ក៏នៅតែបន្តជំហានលើវិថីចាស់ជាតារាចម្រៀងដូចដើម៕