Sam Smith ដាក់មួយសប្បាយដៃ ថតរូបកប់ៗផ្អើលអស់អ្នកគាំទ្រ ពេលមកដើរលេងនៅថៃ

Sam Smith គឺជាតារាចម្រៀងជនជាតិអង់គ្លេសម្នាក់ វ័យ ៣០ ឆ្នាំ ដែលមានសំឡេងក្រអួនក្រអៅ ទាក់អស់ចិត្តមហាជនអ្នកគាំទ្រតាមរយៈបទចម្រៀងមនោសញ្ចេតនាជាច្រើនបទ។

យ៉ាងណាមិញ នៅចុងឆ្នាំនេះ ខណៈរដូវកាលគ្រិស្តស្មាស Sam Smith មិនបាននៅអបអរសាទរ ប្រើពេលវេលាជាមួយគ្រួសារ ឬ ស្រុកកំណើតរបស់ខ្លួនឡើយ គេឃើញលោកបានហោះហើរមកលេងក្រៅប្រទេសជាមួយនឹងមិត្តភក្តិឯណេះវិញ។ ក្នុងនោះ Sam Smith បានមកលេងលម្ហែខួរក្បាលនៅប្រទេសថៃ ដោយមិត្តភក្តិជាច្រើននាក់មកជាមួយផងដែរ។

លោកបានបង្ហោះរូបភាពជាច្រើនសន្លឹក នៅតាមរយៈគណនីរបស់ខ្លួន ដែលបានបង្ហាញឱ្យឃើញពីសកម្មភាពរបស់លោកជាច្រើន ដែលកំពុងដើរកម្សាន្តក្នុងប្រទេសថៃ លោកបានតែងខ្លួន រួចជិះម៉ូតូកម្សាន្តសប្បាយៗ ដូចអ្នកនៅក្នុងស្រុកដូច្នោះឯង ដែលធ្វើឱ្យមនុស្សម្នាជុំវិញក្រឡេកភ្នែកមកមើលព្រាត។

លើសពីនេះទៅទៀត លោកក៏បានឆ្លៀតទៅលែងខ្លួន អាំងថ្ងៃនៅសមុទ្រទៀតផង ពោលគឺមើលទៅលោកពិតជាពេញចិត្តជាមួយនឹងដំណើរកម្សាន្តមួយនេះខ្លាំងណាស់។ ជាមួយគ្នានេះ មហាជនអ្នកគាំទ្រថៃជាច្រើន ម្នាក់នាំគ្នាខមមិនស្វាគមន៍លោកពាសពេញបណ្តាញសង្គម ហើយក៏សង្ឃឹមថា​ លោកនឹងប្រើពេលវេលាឱ្យសប្បាយមួយអស់ដៃផងដែរ៕