ណានណាន កូនតារាកំប្លែង ស្រី អ៊ីត ត្រៀមបង្ហាញវត្តមានលើឆាកប្រកួតបវរកញ្ញា

ដូចប្រិយមិត្តភាគច្រើនបានជ្រាបហើយថា តារាកំប្លែង ស្រីអ៊ីត មានកូនស្រីម្នាក់ឈ្មោះ ង៉ា ស្រីណាន។ ដោយសារតែជាកូនអ្នកសិល្បៈ ធ្វើឱ្យ ស្រីណាន ក៏មានទេពកោសល្យផ្នែកសិល្បៈមិនចាញ់ម្ដាយប៉ុន្មានដែរ គ្រាន់តែ ស្រីអ៊ីត ជាអ្នកកំប្លែង តែនាងមានជំនាញផ្នែកចម្រៀងប៉ុណ្ណោះ ហើយកាលពីឆ្នាំ ២០១៩ កន្លងទៅ កូនស្រីតារាកំប្លែងរូបនេះ បានចូលរួមការប្រឡងកម្មវិធីលំដាប់ពិភពលោក X Factor Cambodia ទៀតផង។

រំលងតែប៉ុន្មានឆ្នាំ ពេលនេះកូនស្រីតារាកំប្លែង ស្រីអ៊ីត គឺកញ្ញា ង៉ា ស្រីណាន កាន់តែធំពេញរូបពេញរាង មើលសឹងមិនស្គាល់ ជាពិសេសមុខមាត់វិញ ក៏កាន់តែស្រស់ស្អាតឡើង គួរជាទីចាប់អារម្មណ៍ខ្លាំងណាស់។

ថ្មីៗនេះ មហាជនអ្នកគាំទ្រជាច្រើនក៏កំពុងតែចាប់អារម្មណ៍យ៉ាងខ្លាំងក្រោយពីផេកផ្លូវការរបស់ Miss Teen International Cambodia បានបង្ហោះរូបភាពបេក្ខភាពចូលរួមប្រកួតសម្រាប់ឆ្នាំ ២០២២-២០២៣ ដោយក្នុងនោះ គេក៏បានឃើញវត្តមានរបស់តារាចម្រៀងវ័យក្មេង កញ្ញា ស្រីណាន ផងដែរ។

ក្រោយពីឃើញវត្តមារបស់ កញ្ញា ង៉ាន ស្រីណាន ក្នុងកម្មវិធីប្រកួតបវរកញ្ញា Miss Teen International Cambodia ឆ្នាំ ២០២២-២០២៣ នេះ មហាជនជាច្រើនក៏បានចូលរួមបោះឆ្នោតជូនកញ្ញាតាមរយៈការចែករំលែករូបភាព និង ចុចចូលចិត្ត ព្រមទាំងជូនពរដល់កញ្ញាឱ្យទទួលបានជោគជ័យផងដែរ៕