(វីដេអូ) ឡូយ ច័ន្ទរស្មី ប្រាប់មូលហេតុយកបទ «បាញ់ស្នេហ៍» និង «រាំញីកែងជើង» រាំបង្ហាញក្នុងវគ្គ Talent Show លើឆាកប្រកួតនៅជប៉ុន
មកដល់ពេលនេះ រយៈពេល ១០ ថ្ងៃមកហើយ ដែលកញ្ញា ឡូយ ច័ន្ទរស្មី បានចាកចេញពីប្រទេសកម្ពុជាទៅកាន់ប្រទេសជប៉ុន ក្នុងនាមជា Miss Cambodia 2024 តំណាងឱ្យកម្ពុជាចូលរួមប្រកួតលើឆាកអន្តរជាតិ Miss International 2024។
ដំណើរនៃការប្រកួតក្នុងកម្មវិធី Miss International 2024 នេះ បានចាប់ផ្តើមពីថ្ងៃទី ២៩ ខែតុលា ដល់ថ្ងៃទី ១៣ ខែវិច្ឆិកា ឆ្នាំ ២០២៤ ដោយពេលនេះដែរ កម្មវិធីកំពុងដំណើរការប្រកួតលើវិញ្ញាសាជាបន្តបន្ទាប់សម្រាប់បេក្ខភាពបវរកញ្ញា និង មានការជួបជុំគ្នា ដើរទស្សនកិច្ចផ្សេងៗ ព្រមទាំងកំពុងតែបង្ហាញសមត្ថភាពហ្វឹកហាត់បន្ថែមទម្រាំដល់ថ្ងៃផ្តាច់ព្រ័ត្រផងដែរ។
យ៉ាងណាមិញ កាលពីថ្ងៃទី ២ ខែវិច្ឆិកា ឆ្នាំ ២០២៤ កន្លងទៅ កម្មវិធី Miss International 2024 ក៏បានរៀបចំការប្រកួតវគ្គ Talent Show ដែលកម្មវិធីបានតម្រូវឱ្យបេក្ខភាពបវរកញ្ញាតំណាងប្រទេសនីមួយៗបង្ហាញសមត្ថភាពរៀងៗខ្លួន និង ថតបង្ហោះលើបណ្ដាញសង្គម ដើម្បីឆក់ការចាប់អារម្មណ៍ពីបណ្ដាអ្នកគាំទ្រនៅទូទាំងប្រទេស។
ក្នុងនោះ ក្រឡេកមើលបវរកញ្ញាកម្ពុជា ឡូយ ច័ន្ទរស្មី វិញ នៅក្នុងវគ្គ Talent Show នេះ បានឃើញកញ្ញាលើកយកការបង្ហាញក្បាច់រាំបែបពេញនិយមនៅកម្ពុជា គឺបទ «បាញ់ស្នេហ៍» និង បទ «រាំញីកែងជើង» រាំបង្ហាញជាមួយនឹងបវរកញ្ញាប្រទេសដទៃលើឆាកអន្តរជាតិនេះ ដែលធ្វើឱ្យអ្នកគាំទ្រកម្ពុជាមានការចាប់អារម្មណ៍ និង សរសើរ ព្រមទាំងក៏មានអ្នកគាំទ្រចំនួនមានចម្ងល់វែកញែកផងដែរ។
ក្រោយពីចប់ការប្រកួតក្នុងវគ្គ Talent Show នេះ ប៉ុន្មានថ្ងៃ ក៏បានឃើញបវរកញ្ញា ឡូយ ច័ន្ទរស្មី ចេញវីដេអូមួយនិយាយបកស្រាយជុំរិញរឿងដែលកញ្ញាបានលើកយកបទចម្រៀងទាំង ២ នេះ មករាំបង្ហាញលើឆាកអន្តរជាតិ និង មិនបានលើកយកបទបែបវប្បធម៌បុរាណខ្មែរ ឬរបាំបុរាណផ្សេងៗ ក៏ព្រោះតែកញ្ញាបានស្វែងយល់ពីកម្មវិធី និង មានការណែនាំពីអ្នករៀបចំកម្មវិធី ដែលគេចង់បានបទចម្រៀង ឬ អ្វីដែលអាចធ្វើឱ្យបវរកញ្ញាដទៃរាំលេងតាមសប្បាយបានគឺល្អ និង អាចទទួលបានការចាប់អារម្មណ៍ច្រើនពីអ្នកគាំទ្រប្រទេសផ្សេងៗផងដែរ៕
សូមទស្សនាវីដេអូខាងក្រោម៖
