សុខ សារ៉ាវីតា និយាយពាក្យបែបនេះ ក្រោយផ្ទុះប្រជាប្រិយភាពខ្លាំងក្នុងកម្មវិធី The Voice Cambodia សប្ដាហ៍ទីមួយ
ពិតណាស់ នៅរាត្រីថ្ងៃទី ០៤ ខែមិថុនា ឆ្នាំ ២០២៣ ម្សិលមិញនេះ លើបណ្ដាញសង្គមបានផ្ទុះចាប់អារម្មណ៍ចែករំលែកព្រោងព្រាតពីមហាជនអ្នកគាំទ្រវិស័យចម្រៀង ជាពិសេសអ្នកតាមដានកម្មវិធី The Voice Cambodia រដូវកាលទី ៣ វគ្គ The Blind Auditions សប្ដាហ៍ទី ១ ជាមួយនឹងការបង្ហាញសមត្ថភាពរបស់បេក្ខនារីមកពីខេត្តកណ្ដាល ឈ្មោះ សុខ សារ៉ាវីតា ដែលឆក់បានការសរសើរខ្លាំងៗចំពោះសមត្ថភាពនៃការបកស្រាយចម្រៀងរបស់នាង។
ក្នុងនោះ បេក្ខនារី សុខ សារ៉ាវីតា បានលើកយកបទចម្រៀង «គ្រាន់តែចង់ដឹង» មកបកស្រាយ ដែលជាសំនៀងដើមរបស់អ្នកនាង ឱក សុគន្ធកញ្ញា ក៏ត្រូវបានទទួលការចុចប៊ូតុងពីគណៈកម្មការទាំង ៤ ព្រមទាំងទទួលបានការចាប់អារម្មណ៍ខ្លាំងពីមហាជនជាមួយនឹងទឹកដមសំឡេងពីរោះ និង សម្រស់ស្រស់ស្អាតរបស់នាងទៀតផង។ ជាមួយគ្នានោះ សុខ សារ៉ាវីតា ក៏បានក្លាយជាកូនក្រុមរបស់ Coach ឱក សុគន្ធកញ្ញា ផងដែរ។
ក្រោយពីជោគជ័យក្នុងវគ្គ The Blind Auditions និង ផ្ទុះការចាប់អារម្មណ៍គាំទ្រខ្លាំងពីមហាជនលើបណ្ដាញសង្គម ក្រឡេកមើលហ្វេសប៊ុករបស់បេក្ខនារី សុខ សារ៉ាវីតា វិញ ក៏បានឃើញនាងបង្ហោះសារបង្ហាញពីអារម្មណ៍របស់ខ្លួនថា ៖ «នាងខ្ញុំ ពិតជាសប្បាយចិត្តខ្លាំងណាស់ អរគុណៗរាល់ពាក្យជូនពរ និង ការលើកទឹកចិត្តពីក្រុមគ្រួសារ និង មិត្តភក្តិទាំងអស់គ្នា»៕
