សុខ សីឡាលីន ពោលឱ្យ ភិទិ ចំៗ ក្រោយរូបគេមិនអាចឈ្នះពាន Cambodian Idol

កាលពីថ្ងៃទី ២៨ ខែសីហា ឆ្នាំ ២០២២ កន្លងទៅ កម្មវិធីប្រឡងចម្រៀង Cambodian Idol បានរកឃើញម្ចាស់ជ័យលាភីលេខ ១ ហើយគឺបានទៅលើ លីម តិចម៉េង។

ក្នុងចំណោមបេក្ខជន Top 4 ទាំង ៤ រូប ថុល សុភិទិ គឺជាបេក្ខជនដ៏លេចធ្លោម្នាក់ ដែលត្រូវបានមហាជនអ្នកគាំទ្រជាច្រើនមានក្ដីរំពឹងថា លោកនឹងឈ្នះពានរង្វាន់ទៀតផង។ តែទោះបីជាមិនអាចក្លាយជាម្ចាស់ពានរង្វាន់ Cambodian Idol រដូវកាលទី ៤ នេះបាន ប៉ុន្ដែ ភិទិ ទទួលបានប្រជាប្រិយភាពយ៉ាងច្រើន និង ត្រូវទស្សនិកជនស្រឡាញ់គាំទ្រភ្លូកទឹកភ្លូកដីក្នុងរយៈពេលដ៏ខ្លី។

ងាកមកគណៈកម្មការ សុខ សីឡាលីន ថ្មីៗនេះបានបង្ហោះរូបថតជាមួយ ថុល សុភិទិ នៅថ្ងៃប្រកួតផ្ដាច់ព្រ័ត្រ ហើយបើទោះបីជា ភិទិ មិនអាចឈ្នះពានរង្វាន់ក៏ដោយ ប៉ុន្ដែគណៈកម្មការស្រីរូបនេះលើកឡើងថា ភិទិ បានឈ្នះបេះដូងអ្នកគាំទ្ររួចស្រេចទៅហើយ។

សុខ សីឡាលីន លើកទឹកចិត្ត ភិទិ ថា ៖ «សុភិទិ ជាបេក្ខជនឆ្នើម និង មានសមត្ថភាពខ្ពស់ក្នុងចិត្តបង និង ហ្វេនគ្រប់ៗគ្នា បងជឿជាក់ថា ភិទិ នឹងជោគជ័យលើវិថីនេះដោយប្អូនបានក្លាយទៅជាអាយដលរបស់បងប្អូនអ្នកគាំទ្រជាច្រើនរួចបាត់ទៅហើយ ជូនពរអូនជោគជ័យ ជាមួយសមត្ថភាព និង អនាគតដ៏ល្អក្នុងវិស័យសិល្បៈ គ្រាប់ពូជសិល្បៈជំនាន់ក្រោយដ៏ល្អ ថុល សុភិទិ»៕