ស៊ូលី ផេង ពោលថា ការប្រគំតន្ដ្រីរបស់ខ្លួនម្សិលមិញ ក្លាយជាប្រវត្តិសាស្ត្រមួយដ៏មានន័យ

ជឿជាក់ថាប្រិយមិត្តដែលនិយមគាំទ្រតារាចម្រៀង Original Song ក្នុងប្រទេស ប្រាកដជាបានស្គាល់រួចមកហើយពីតារាចម្រៀង និយមច្រៀងបទចម្រៀងមនោសញ្ចេតនាសោកសៅជាច្រើន គឺលោក ស៊ូលី ផេង។

តារាចម្រៀងប្រុសរូបនេះ ត្រូវបានអ្នកគាំទ្រជាច្រើនចាត់ទុកថាជា បុរសកំពូលសោកសៅ ព្រោះសឹងតែគ្រប់បទចម្រៀងរបស់លោក គឺសុទ្ធសឹងតែជាប្រភេទបទបែបមនោសញ្ចេតនា ស្នេហាបែកបាក់ ឈឺចាប់ ព្រាត់ប្រាស់ ឆ្លុះបញ្ចាំងពីជីវិតស្នេហាយុវវ័យក្នុងសង្គម កម្រនឹងមានបទរីករាយស្រស់បំព្រងណាស់។

យ៉ាងណាមិញ កាលពីរាត្រីថ្ងៃទី ១១ ខែកញ្ញា ឆ្នាំ២០២២ កន្លងទៅនេះ លោក ស៊ូលី ផេង បានសម្ពោធអាល់ប៊ុមរបស់ខ្លួន «The Past» ជាផ្លូវការ និង បានរៀបចំការប្រគំតន្រ្តីដែលមានចំណងជើងថា «The Past Concert» នៅឯ AEON Hall Sensok ដែលមានការចូលរួមយ៉ាងច្រើនកុះករពីសំណាក់អ្នកគាំទ្រ ព្រមទាំង Influencers និង សិល្បៈករសិល្បៈការនីជាច្រើនផ្សេងទៀតផងដែរ។

ដោយឡែក បន្ទាប់ពីការប្រគំតន្រ្តីទោលរបស់ខ្លួនបានបញ្ចប់យ៉ាងជោគជ័យរួចមក នាព្រឹកថ្ងៃទី ១២ ខែកញ្ញា នេះ លោកស៊ូលី ផេងបានទម្លាយអារម្មណ៍យ៉ាងរំភើបក្រៃលែង ចូលទៅក្នុងគណនីបណ្ដាញសង្គមហេ្វសបុករបស់លោក។

ស៊ូលី ផេង បានបញ្ជាក់អារម្មណ៍យ៉ាងរំភើបបែបនេះថា៖ «ពិតជាគ្មានអ្វីនិយាយក្រៅពីពាក្យថាអរគុណ អ្នកទាំងអស់គ្នាសម្រាប់ការចួលរួមការប្រគំតន្រ្តី THE PAST 11.09.2022 គឺជាប្រវត្តិសាស្ត្រមួយដ៏មានន័យសម្រាប់ជីវិតខ្ញុំបាទ»៕