ពូកែណាស់! តាមពិតនាងតូច ហ្សាណា ដែលឈ្នះមកុដបវរកញ្ញាតូច ធ្លាប់ចូលប្រឡងចម្រៀងក្នុងកម្មវិធីពិភពលោក ២ នេះ

កាលពីថ្ងៃទី ០៥ ខែសីហា ឆ្នាំ ២០២៣ កន្លងទៅ អ្នកគាំទ្រវិស័យបវរកញ្ញាកម្ពុជាមានការសប្បាយរីករាយជាខ្លាំង ក្រោយកម្មវិធីប្រកួតសម្រស់កុមារ Mini Miss Cambodia ឆ្នាំ ២០២៣ បានរកឃើញម្ចាស់មកុដដំបូងរបស់ខ្លួន គឺបានទៅលើកុមារី កែវ ហ្សាណា ដែលនាងតូចនឹងត្រូវតំណាងឱ្យកម្ពុជាប្រកួតលើឆាកអន្តរជាតិក្នុងប្រទេសថៃនាពេលខាងមុខ។

ចំពោះម្ចាស់មកុដដំបូងនៃកម្មវិធី Mini Miss Cambodia ឆ្នាំ ២០២៣ នេះ ត្រូវបានគេកត់សម្គាល់ឃើញថាមានទាំងសមត្ថភាព និង សម្រស់ស្រស់ស្អាត។ អ្វីដែលសំខាន់នាងតូច ហ្សាណា ក៏ធ្លាប់ជាអតីបេក្ខជនប្រកួតកម្មវិធីចម្រៀងដ៏មានប្រជាប្រិយភាពម្នាក់ក្នុងកម្មវិធី The Voice Kids Cambodia និង Idol Junior Cambodia ផងដែរ។

ទន្ទឹមនឹងដណ្ដើមបានមកុដជាបវរកញ្ញាវ័យក្មេងរបស់កម្ពុជានេះ គេឃើញមានការសាទរពីមហាជនជាខ្លាំង ព្រោះថាប្រទេសកម្ពុជាក៏មាននូវគ្រាប់ពេជ្រដ៏ល្អដែលអាចតំណាងឱ្យប្រទេសទៅប្រកួតប្រជែងលើឆាកអន្តរជាតិបាន ជាពិសេសមហាជនបានដាក់ក្តីរំពឹងថាអូន ហ្សាណា នឹងអាចដណ្ដើមយកជ័យលាភីជូនជាតិជាក់ជាពុំខាន៕