ទំនាយឆ្នាំទាំង ១២ តាមតម្រាចិនប្រាប់ថា ឆ្នាំខ្លះល្អ ឯឆ្នាំខ្លះដាក់ខ្លាំង មិនឱ្យទៅសួរសុខទុក្ខអ្នកជំងឺ ឬទៅបុណ្យស-ពទេ

បណ្ឌិតហោរាសាស្ត្រខ្មែរ អ៊ឹម បុរិន្ទ ថ្មីៗនេះបានចែករំលែកនូវជោគជតារាសីប្រចាំឆ្នាំថោះ ឆ្នាំ ២០២៣ ដែលនឹងចូលមកជំនួសឆ្នាំខាល។ ក្នុងនោះ ទំនាយប្រចាំឆ្នាំថោះ ២០២៣ តាមតម្រាហោរសាស្ត្រចិន មានដូចជា ៖

១. ឆ្នាំជូត

លោកអ្នកនឹងមានវត្ថុគ្រប់យ៉ាងសមតាមសេចក្ដីប្រាថ្នា ការងារនឹងរៀបរយ មានមង្គលគ្រប់យ៉ាងលាភផលពូនបន្ថែមឡើង។ បើជាមនុស្សស្រីនឹងមានកិត្តិយសឈ្មោះសំឡេង បើជាមនុស្សប្រុសនឹងមានឧបសគ្គ មានរឿងស្មុគស្មាញចិត្ត មានការឈ្លោះវិវាទ។

២. ឆ្នាំឆ្លូវ

មានរឿងនឹកគិតមិនដល់ រឿងយានជំនិះឧប្បត្តិហេតុ ឈឺថ្កាត់មានរបួសស្នាម អស់ប្រាក់មាស ហាមពាក្យធានា នឹងមានរឿងអពមង្គលដែលនឹកស្មានមិនដល់ ឈឺថ្កាត់ បុណ្យសព ខូចខាតបាត់បង់ប្រាក់កាស ហាមទៅចូលរួមបុណ្យសព ហាមទៅសួរសុខទុក្ខអ្នកជំងឺ។

៣. ឆ្នាំខាល នឹងមានរោគភ័យឈឺថ្កាត់មកសួរសុខទុក្ខ មានសេចក្ដីស្មុគស្មាញក្នុងចិត្ត បាត់បង់មាសប្រាក់។ មនុស្សប្រុសនឹងមានឈ្មោះសំឡេង មានយសបណ្ដាស័ក្តិ លាភផលប្រាក់មាសចូលមកយ៉ាងច្រើន ការធ្វើដំណើរឆ្ងាយបានលាភ។ បើជាស្ត្រីនឹងមានការឈ្លោះវិវាទ។

៤. ឆ្នាំថោះ

មានទោស មានភ័យ កិច្ចការមានឧបសគ្គធ្វើការមង្គលក៏មានឧបសគ្គមិនរៀបរយ។

៥. ឆ្នាំរោង

មនុស្សប្រុស នឹងមានឈ្មោះសំឡេង ឡើងយសបណ្ដាស័ក្តិ លាភផលមាសប្រាក់ចូលមកជាច្រើន ធ្វើដំណើរឆ្ងាយនឹងមានលាភ។ ស្រ្តីនឹងមានការឈ្លោះវិវាទមានមាត់មាន-ក នឹងមានរោគភ័យឈឺថ្កាត់មកសួរសុខទុក្ខ មានសេចក្ដីស្មុគស្មាញពិបាកចិត្ត និង មានការបាត់បង់ប្រាក់កាស។

៦. ឆ្នាំម្សាញ់

នឹងមានរឿងអពមង្គល ដែលនឹកស្មានមិនដល់ ឈឺថ្កាត់ បុណ្យសព បាត់បង់ប្រាក់កាស ហាមទៅចូលរួមបុណ្យសព ហាមទៅសួរសុខទុក្ខអ្នកជំងឺ មានរឿងរ៉ាវនឹកស្មានមិនដល់ រឿងយានជំនិះមានការឈឺថ្កាត់មានរបួសស្នាម ឧប្បតិ្តហេតុ ហាមមានពាក្យធានា។

៧. ឆ្នាំមមី

ស្ត្រីនឹងមានឈ្មោះបោះសំឡេង ឯមនុស្សប្រុសនឹងមានឧបសគ្គមានរឿងរ៉ាវស្មុគស្មាញក្នុងចិត្ត មានមាត់មាន-ក មានការឈ្លោះវិវាទ មានវត្ថុគ្រប់យ៉ាងសមសេចក្ដីប្រាថ្នា ការងារនឹងរៀបរយ មានមង្គលគ្រប់យ៉ាង មានលាភផលពូនបន្ថែមឡើង។

៨. ឆ្នាំមមែ

ប្រយ័ត្នភ័យពីមនុស្សដទៃ មានរឿងត្រូវចោទប្រកាន់ឡើងរោងឡើងសាលា ជាប់គុកខូចខាតទុន និង មានទោស បាត់បង់បុគ្គលាករ (ភាពជាបុគ្គលិក Personnal) ឈាមនឹងធ្លាក់ចេញពីខ្លួន បញ្ហាទាក់ទងនឹងរថយន្ត ឈឺថ្កាត់ មានរឿងមិនល្អកើតឡើង។

៩. ឆ្នាំវក

មានចោរភ័យចូលផ្ទះ មិនស័ក្ដិសមក្នុងការចុះទុនរួមភាគហ៊ុន បើជាស្ត្រីនឹងមានអ្នកឧបត្ថម្ភគាំទ្រដែលល្អ នឹងមានរឿងជាមង្គលផ្សេងៗជាច្រើន ជាពិសេសសម្រេចក្នុងការងារ ការធ្វើដំណើរឆ្ងាយល្អ។

១០. រកា

ឆ្នាំរកា មានរឿងសោកសៅ ការងារ ផ្ទះសម្បែង កូនចៅ មានឧបសគ្គ ហាមជួសជុលផ្ទះ។

១១. ឆ្នាំច

មានរឿងជាមង្គលផ្សេងៗជាច្រើន លេចធ្លោរល្អវិសេស សម្រេចក្នុងការងារធ្វើដំណើរឆ្ងាយល្អ នឹងមានចោរភ័យចូលផ្ទះ។ មិនស័ក្ដិសមដែលនឹងចុះទុន បើជាស្ត្រីនឹងមានអ្នកឧបត្ថម្ភដែលល្អ។

១២. ឆ្នាំកុរ

ឈាមនឹងហូរចេញពីខ្លួន បញ្ហាទាក់ទងនឹងរថយន្ត ឈឺថ្កាត់ មានរឿងមិនល្អកើតឡើង ប្រយ័ត្នភ័យពីអ្នកដទៃ មានរឿងត្រូវចោទប្រកាន់ ឡើងរោងឡើងសាលា ជាប់គុក ខាតទុន៕