ទម្លាយប្រវត្តិតស៊ូរបស់ប្រុសសង្ហា Lee Jung Suk ក្នុងវិស័យសិល្បៈ ទម្រាំបានជោគជ័យទាំងការងារ និង ស្នេហា

តារាប្រុសសង្ហា Lee Jung Suk វ័យ ៣៣ ឆ្នាំ តារាប្រុសជួរមុខរបស់កូរ៉េ មានសមត្ថភាពសិល្បៈការសម្តែងយ៉ាងគួរឱ្យជាប់ចិត្ត ធ្វើឱ្យមហាជនស្រឡាញ់គាំទ្រស្ទើរលេប។

បើក្រឡេកទៅមើលប្រវត្តិរបស់លោកវិញ ក៏មិនសូវស្រួលរលូនប៉ុន្មានដែរ ដោយដំបូងឡើយ លោកគឺជាអ្នកហ្វឹកហាត់ម្នាក់ នៅក្រោមផលិតកម្ម SM ដែលគេសន្យាថា លោកនឹងបានក្លាយជាសមាជិករបស់ក្រុមចម្រៀងមួយ។ តែគួរឱ្យសោកស្តាយ ខាងផលិតកម្ម មិនបានធ្វើតាមសន្យាឡើយ ដែលធ្វើឱ្យលោកខកចិត្តយ៉ាងខ្លាំង ហើយក៏បានចេញពីផលិតកម្មនោះមក។

ពេលនោះ លោកបានងាកមកដើរផ្លូវថ្មី មិនបោះបង់ឡើយ ដោយឈានជើងចូលការសម្តែងវិញ។ លោកចាប់ផ្តើមលេចមុខនៅក្នុងរឿង School 2013, Pinocchio រហូតបានក្តាប់ជាប់តំណែងជាតួឯកជាបន្តបន្ទាប់ ហើយក្លាយជាតារាជួរមុខ ទាញបានចំណូលរាប់លានដុល្លារឯណោះ។ បើនិយាយមកទល់ពេលនេះ ទ្រព្យសម្បត្តិរបស់លោក ត្រូវបានគេដឹងថា មានរហូតដល់ ៥០ លានដុល្លារទៅហើយ។

ចំណែករឿងបេះដូងវិញ ថ្មីៗនេះ Lee Jung Suk បានរកស្នេហ៍ឃើញជាមួយនឹងតារាស្រី IU ដែលជាតារាស្រីកំពូលម្នាក់របស់កូរ៉េទៀតផង មើលទៅទាំងគូ ពិតជាគូស្នេហ៍ដែលសែនស័ក្តសមនឹងគ្នាណាស់។ បច្ចុប្បន្ន មហាជនអ្នកគាំទ្រ ពិតជានឹកសរសើរនូវការតស៊ូ បួករួមនឹងសំណាងរបស់ប្រុសស្អាតរូបនេះមិនតិចឡើយ ព្រោះជោគជ័យរលូនទាំងរឿងការងារ និង រឿងស្នេហាបែបនេះ៕