តារាសម្ដែង Stephen Chow ដែលប្រិយមិត្តកម្ពុជាស្គាល់ថា «ទិនហ្វី» នោះ គឺជាតារាសម្ដែងជើងចាស់ម្នាក់ ដែលតែងតែផ្ដល់សំណើច និង ភាពរីករាយដល់អ្នកទស្សនា ជាមួយនឹងទេពកោសល្យសម្ដែងដ៏ប៉ិនប្រសប់របស់លោក ។
បច្ចុប្បន្នតារាប្រុសរូបនេះ បានដកខ្លួនពីវិស័យសម្ដែង មកចាប់ផ្ដើមលើអាជីពជាអ្នកដឹកនាំរឿងវិញ ដែលរឿងរបស់លោកដឹកនាំកន្លងមកគឺទទួលបានការគាំទ្រជាខ្លាំង ។ ងាកមកជីវិតប្រចាំថ្ងៃរបស់ទិនហ្វីវិញ បើទោះបីជាមានទ្រព្យសម្បត្តិរាប់សិបលានដុល្លារក្ដី ប៉ុន្តែលោកនៅតែរីករាយជ្រើសយកជីវិតបែបសាមញ្ញៗ ។
ទិនហ្វី ត្រូវបានឱ្យដឹងថា ជាតារាម្នាក់ដែលដាក់ខ្លួនបំផុត បច្ចុប្បន្នរូបលោករស់នៅក្នុងភូមិគ្រឹះដ៏ធំមួយលើកំពូលភ្នំ ។ នៅទីនោះ គឺមានភាពស្ងប់ស្ងាត់ល្អ ទិដ្ឋភាពក៏ល្អស្រស់ត្រកាល ហ៊ុមព័ទ្ធដោយព្រៃព្រឹក្សាធម្មជាតិពិតៗ ។
ព្រមគ្នានេះដែរ បើទោះបីជាបច្ចុប្បន្នលោកជាតារាម្នាក់ដែលមានទ្រព្យសម្បត្តិស្តុកស្តម្ភក៏ពិតមែន ប៉ុន្តែ ទិនហ្វី ត្រូវបានអ្នកគាំទ្រចាប់អារម្មណ៍ថា រូបលោកមានទម្លាប់ដ៏សាមញ្ញបំផុតមួយ ដែលពេលធ្វើដំណើរទៅណាមកណា រូបលោកគឺជាញឹកញាប់តែងតែជិះកង់ជានិច្ច មិនសូវឃើញជិះរថយន្តនោះឡើយ ។
ទម្លាប់ដ៏សាមញ្ញមួយនេះហើយ បានធ្វើឱ្យអ្នកគាំទ្ររបស់លោកជាច្រើនស្ងើចសរសើរ ដែលរូបលោកហាក់មិនបង្ហាញពីភាពឡូយឆាយហ៊ឺហា ជិះឡានទំនើបៗ តែបែរជាចូលចិត្តរបៀបរបបរស់នៅជាមួយធម្មជាតិ ដាក់ខ្លួនគួរឱ្យគោរព៕
