ភ័យបុកពោះ! នៅបាត់ដំបង កំពុងជីកកាយរណ្ដៅរកដាំដំណាំហូបផ្លែ ស្រាប់តែប្រទះឃើញគ្រាប់មីន ៧៩ គ្រាប់
នៅព្រឹកថ្ងៃទី ២៣ ខែកក្ដដា ឆ្នាំ ២០២៤ នេះ មជ្ឈមណ្ឌលសកម្មភាពកំចាត់មីនកម្ពុជា បានជូនដំណឹងពីការដោះយកគ្រាប់មីន ៧៩ គ្រាប់ ដែលប្រជាពលរដ្ឋបានប្រទះឃើញក្នុងស្រុកកំរៀង ភូមិសាស្ត្រខេត្តបាត់ដំបង។
ទាក់ទិនទៅនឹងរឿងនេះ មជ្ឈមណ្ឌលសកម្មភាពកំចាត់មីនកម្ពុជា ឬ ហៅកាត់ថា CMAC បានបញ្ជាក់ឱ្យបានដឹងថា គ្រាប់មីនប្រឆាំងមនុស្សចំនួន ៧៩ គ្រាប់ ត្រូវបានម្ចាស់ដីដែលកាយរណ្តៅ ដាំដំណាំហូបផ្លែប្រទះឃើញ ឋិតនៅភូមិគគីរ ឃុំអូរដា ស្រុកកំរៀង ខេត្តបាត់ដំបង ហើយបានរាយការណ៍ដល់កម្លាំងអង្គភាពស៊ីម៉ាក់ដើម្បីចុះទៅអន្តរាគមន៍។
ក្រោយទទួលបានដំណឹងនេះភ្លាម អ្នកឯកទេសបោសសម្អាតគ្រាប់យុទ្ធភណ្ឌមិនទាន់ផ្ទុះរបស់អង្គភាពស៊ីម៉ាក់ បានចុះទៅដល់ទីតាំងឋិតនៅភូមិគគីរ ឃុំអូរដា ស្រុកកំរៀង ខេត្តបាត់ដំបង និង បានយកគ្រាប់ទាំងនោះចេញប្រកបដោយសុវត្ថិភាព៕
