ពេជ្រ សោភា ពោលពាក្យបែបនេះភ្លាម ក្រោយជួយឱ្យកូនក្រុមលើកពាន The Voice Cambodia រដូវកាលទី ៣
ក្រោយពីប្រកួតយ៉ាងស្វិតស្វាញមកជាច្រើនខែ នៅក្នុងរាត្រីថ្ងៃទី ០១ ខែកញ្ញា ឆ្នាំ ២០២៣ កន្លងទៅកម្មវិធីប្រឡងចម្រៀងលំដាប់ពិភពលោក The Voice Cambodia រដូវកាលទី ៣ បានឈានដល់វគ្គផ្ដាច់ព្រ័ត្រហើយ ដោយក្នុងនោះ កម្មវិធីក៏បានស្វែងរកឃើញម្ចាស់ពានដែរ គឺបានទៅលើបេក្ខភាពកូនក្រុម Coach ពេជ្រ សោភាព គឺកញ្ញា លឹម សេរីហាន់នីកា។
បន្ទាប់ពីប្រកាសម្ចាស់ជ័យលាភីរដូវកាលទី ៣ ថាបានទៅលើស្រីស្រស់ លឹម សេរីហាន់នីកា មហាជនក៏ដូចជាអ្នកគាំទ្រតាមដានកម្មវិធីប្រឡងចម្រៀងទូទាំងប្រទេសបានបង្ហាញអារម្មណ៍រំភើប និង ធ្វើការអបអរសាទរ ព្រមទាំងបង្ហាញការស្រឡាញ់ពេញចិត្តយ៉ាងខ្លាំងចំពោះម្ចាស់ជ័យលាភីរូបនេះ ដោយបានលើកសរសើរពីសមត្ថភាព និង ទឹកដមសំឡេងថាពិតជាស័ក្តិសមឥតទាស់។
ងាកទៅមើលតារាចម្រៀងស្រី ពេជ្រ សោភា ដែលជាគ្រូបង្វឹកវិញ ខណៈដែលរដូវកាលនេះកូនក្រុមខ្លួនទទួលបានពាន នាងពិតជាសប្បាយរីករាយ និង រំភើបចិត្តជាខ្លាំង។ ក្នុងនោះ នាងបានចេញមកបង្ហោះបង្ហាញពីអារម្មណ៍ថា ៖ « congratulations ក្មេងតូច លឹម សេរីហាន់នីកា។ សមត្ថភាពនាំឱ្យទទួលបានជោគជ័យក្នុងនាមខ្ញុំជាគ្រូបង្វឹកពិតជាសប្បាយចិត្តចំពោះការជោគជ័យរបស់អូន។ នាងខ្ញុំពេជ្រ សោភា សូមអរគុណដល់ពូមីងបងប្អូនទូទាំងប្រទេសដែលស្រឡាញ់ និង គាំទ្រ នីកា ដោយមើលឃើញពីសមត្ថភាព»៕
